Blizzard pyet lojtarët e WoW Classic për The Burning Crusade

Mbase mund të kemi një remaster si The Burning Crusade Classic

Blizzard ka pyetur disa lojtarë të World of Warcraft Classic nëpërmjet një sondazhi për mendimin e tyre rreth disa çështjeve të ndryshme. Disa prej këtyre pyetjeve kishin lidhje me lançimin e expansion-it The Burning Crusade në Classic. Disa screenshots të këtyre pyetjeve u postuan në Reddit. Pyetja e parë thjesht pyeste lojtarët se sa të interesuar do të ishin për një version Classic të The Burning Crusade. Ndërkohë, e dyta i pyeste ata se si duhej që Classic Burning Crusade të niste, duke dhënë disa opsione mjaft të përfolura në rrjetet sociale.

Edhe pse ky sondazh i është dërguar vetëm një numri të vogël lojtarësh të World of Warcraft Classic, Blizzard padyshim që do të kërkojë mendimin e të gjithë lojtarëve. Është e rëndësishme të kemi parasysh se ky nuk është një konfirmim se Blizzard po punon për The Burning Crusade Classic, pasi kompania zhvillon shpesh sondazhe të tilla për të parë kërkesat e lojtarëve. Gjithsesi, World of Warcraft Classic pati shumë sukses dhe nëse ka interes, Blizzard mund të kthejë edhe The Burning Crusade ose expansions të tjera.