WhatsApp gjobitet 267 milion dollarë për shkelje privatësie

Nuk është hera e parë qe dëgjojmë se një kompani e rrjeteve sociale gjobitet për shkelje të rregullores në lidhje me të dhënat personale të përdoruesve. WhatsApp në pronësi të Facebook është gjobitur me 225 milionë euro (267 milionë dollarë) për shkeljen e rregullave nga Bashkimi Evropian të privatësisë së të dhënave.

Komisioni i Mbrojtjes së të Dhënave të Irlandës (DPC) njoftoi vendimin në një përmbledhje prej 89 faqesh (PDF), duke vënë në dukje se WhatsApp nuk i informoi siç duhet qytetarët e BE-së se si i trajton të dhënat e tyre personale, përfshirë mënyrën se si e ndan atë informacion me kompaninë e saj kryesore.

WhatsApp është urdhëruar të bëjë përditësime në politikën e saj të privatësisë dhe të ndryshojë mënyrën se si njofton përdoruesit për ndarjen e të dhënave të tyre. Kjo do ta sjellë atë në përputhje me Rregulloren e Përgjithshme të Evropës për Mbrojtjen e të Dhënave (GDPR) e cila rregullon mënyrën se si kompanitë e teknologjisë mbledhin dhe përdorin të dhënat në BE. GDPR hyri në fuqi në maj të 2018, dhe WhatsApp ishte një nga kompanitë e para që u godit me padi për privatësinë sipas rregullores.