Watch Dogs Legion është bërë leak dhe mund të luani si çdo NPC

Loja u listua gabimisht në Amazon para se të hiqej

Një lojë e re Watch Dogs është bërë leak para E3 2019. Një listim për një lojë të quajtur Watch Dogs Legion u shfaq në Amazon UK mbrëmë dhe është mbështetur nga burime të ndryshme.

Ky listim (i cili tashmë është hequr, por mund ta gjeni më poshtë në artikull) zbulon emrin e lojës dhe çmimin prej £57.99. Gjithashtu, ka dhe një përshkrim produkti, i cili thotë se mund “të luani si kushdo. Çdo person që takoni në botën e lojës ka një set të plotë animimesh, zërash, personaliteti dhe grafikash që gjenerohen dhe drejtohen nga vetë loja.”

Sipas një raporti, nëpërmjet këtij sistemi mund të përjetoni ngjarje të ndryshme në lojë në kohë të ndryshme në varësi të NPC që po luani. Një sistem kaq kompleks padyshim që i ka hapur probleme Ubisoft për zhvillimin e tij, i cili me shumë mundësi ka shkaktuar disa vonesa, edhe pse asgjë ende nuk është konfirmuar.

Edhe pse Legion nuk është zbulimi që prisnim për Watch Dogs 3 (sidomos nga emri), duket se raportimet që loja do të zhvillohej në Londër janë të sakta. Zërat thonë se Legion do të zhvillohet në një Londër distopiane pas Brexit, por kjo ende nuk është konfirmuar.

Çfarëdolloj historie të ketë Watch Dogs Legion, gjithçka do të zbulohet gjatë konferencës së Ubisoft në E3 javën e ardhshme.