Nga fundi i vitit që lamë pas, një update në kodin e një faqeje partere të Steam sugjeroi se Valve mund të ishte duke punuar me një shërbim streaming të ngjashëm me Stadia. Diçka e quajtur ‘Steam Cloud Gaming’ doli në kod atëherë dhe tani duket se ky fragment është rishfaqur në betan e klientit të fundit të platformës.
Dataminer-i Pavel Sjundik postoi disa pamje të kodit në Twitter, që referonin një shërbim cloud gaming. Në imazhin e parë mund të shikoni frazën: “Methods for Steam cloud gaming operations”. Interesante.
Nuk është ende e qartë se çfarë mund të nënkuptojnë këto zbulime dhe ja vlen të përmendim që një shërbim cloud gaming i Steam nuk është konfirmuar nga Valve. Gjithsesi padyshim që përforcon spekulimet se studioja ka një As të vetin nën mëngë në këtë sektor.
Duke marrë parasysh se gjigandë të tjerë të teknologjisë si Google dhe Microsoft kanë shërbimet e tyre në cloud gaming, respektivisht me Stadia dhe xCloud, nuk do të ishte surprizuese sikur Valve gjithashtu të ketë vendosur të lançojë platformën e saj. Na mbetet të presim dhe të shohim.