Uno sapo përdori Twitter për të na mësuar se si luhet loja

Mendoj se nëse e keni klikuar këtë artikull e luani Uno, por nëse thjesht e keni klikuar nga kurioziteti, Uno është një lojë fantastike me letra që.. le të themi ka shkaktuar shumë zënka mes rretheve shoqërore dhe familjare, pikërisht prej një letre të mallkuar në të gjithë pakon.

Po flasim këtu për +4. Normalisht kjo është letra që ka shkaktuar më shumë polemika në çdo lojë të mundshme Uno që keni bërë në jetën tuaj. Ndaj për të sqaruar pak më mirë rregullat e lojës, vetë adresa e lojës në Twitter vendosi ti tregojë botës se si funksionon.

“Nëse dikush hedh +4, ju duhet të tërhiqni 4 dhe të prisni rradhën tjetër. Nuk mund të hidhni + 2 që personi tjetër të tërheqë gjashtë.”

Pra ngjeshja e letrave +2 ose +4 është e ndaluar dhe madje thuhet edhe në rregulloren e lojës. Gjithsesi përgjigjet e njerëzve ishin nga më komiket dhe sigurisht që askush nuk ra dakord me këtë pohim.

“Unë pagova për ato letra dhe do i luaj si të më dojë qefi.” Ishte një nga përgjigjet e kthyera ndaj Tweet-it.

Ndaj, sado që tani të gjithë e dimë që është kundër rregullave, të paktën kemi rënë dakord që do e luajmë lojën si të na vijë ne për mbarë. Në këtë pikë, rip shokut që do i duhet të tërheqë 12 letra.