CEO i Epic Games, Tim Sweeney po përballet me kritika për komentet e bëra së fundmi gjatë një eventi online të Dealbook. Duke diskutuar për betejën e vazhdueshme ligjore me Apple, Sweeney tha: “është detyrimi i të gjithëve që të luftojmë” këto rregulla të padrejta, të të njejtën mënyrë që është një nevojë morale të luftosh për të drejtat civile.
“Është detyra e të gjithëve që të luftojnë,” tha Sweeney. “Nuk është vetëm një opsion që duhet ta vendosin avokatët e dikujt, por është realisht detyra jonë ta luftojmë këtë. Nëse do i ishim bindur kushteve të Apple dhe të kishim pranuar tarifën e 30%, për ta kaluar më tej atë kosto në klientët tanë, do të ishte sikur Epic po bashkëpunonte me Apple për të frenuar konkurencën në iOS dhe për të rritur çmimin për klientët.”
“Të biesh dakord me kushtet e Apple është veprimi i gabuar në këtë mes. Për këtë arsye Epic mori përsipër ta sfidojë këtë gjë dhe mund të përmendim edhe raste të luftës për të drejtat civile, kur kishte ligje aktuale që ishin të gabuara. Njerëzit nuk ju bindën këtyre ligjeve dhe kjo mosbindje nuk ishte e gabuar, pasi të bije dakord me këtë gjë do të ishte një dakordësi për t’i lënë në statusin e shtypur ku ishin.”
Epic nuk komentoi më tej në këtë deklaratë, por Sweeney e konfirmoi vërtetësinë e këtyre fjalëve në Twitter.
Ai e mbrojti përgjigjen e tij, duke pranuar se nuk po krahasonte vështirësinë e të luftuarit për të drejtat civile me luftën kundër këtij monopoli, por shtoi se kompanitë shpesh negociojnë në mënyrë private për përfitime personale, duke devijuar nga detyrimet e tyre morale.
Thelbi i përgjithshëm që duhet të ngrihemi në mbrojtje të së moralshmes është i drejtë, por krahasimi mes dy korporatave shumë fitimprurëse si Epic dhe Apple me lëvizjen për të drejtat civile, nuk ra fort mirë në veshin e të tjerëve. Një numër i madh njerëzish vunë në dukje se krahasimi nuk mund të qëndrojë dhe se ishte i papërshtatshëm dhe ofendues.