Seriali gjithashtu nuk do të ketë një antagonist kryesor
Seriali gjithashtu nuk do të ketë një antagonist kryesor
Është çështje kohe derisa The Witcher i Netflix të publikojë trailer-in e parë dhe më pas sigurisht sezonin e parë. Fundja edhe pak muaj kanë mbetur nga 2019. Seriali që është i bazuar në novelën e Andrzej Sapkowski do të ketë një panel në Comic-Con sot dhe aty do të marrim shumë informacione rreth tij. Gjithsesi disa prej pyetjeve tashmë e kanë marrë një përgjigje.
Gjatë një interviste para San Diego Comic Con 2019, u fol për kastin e serialit dhe adaptime të ndryshme që i ishin bërë. Pjesa më interesante ishte se seriali nuk do të ishte për grupmosha të vogla. Lauren Hissrich, që është pak a shumë koka e skuadrës pas serialit u shpreh në një mënyrë të tillë:
“I kam parë të gjitha skenat e xhiruara deri më tani dhe fëmijët e mi nuk lejohet të jenë me mua në ato momente, pasi një herë i kapi syri diçka dhe u trembën. Është një serial për të rritur. Dua të theksoj se për mua ishte shumë e rëndësishme që dhuna dhe seksi të luanin rolin e duhur në historinë e zhvilluar dhe jo që thjesht të ishin aty sa për të shokuar publikun. Mendoj se audienca do e kuptojë këtë gjë.”
Pra patjetër që do të jetë skena dhune dhe skena seksi në serial, por kjo nuk është shokuese për asnjë person që tashmë është i njohur me materialin e The Witcher. Në fakt të gjitha seritë njihen për elementët e përbindëshave, horrorit, seksit dhe kombinimeve të tyre.
Ideja e historisë është që Geralt of Rivia duhet të përballet me armiq të ndryshëm. Të paktën kjo logjikë është ndjekur edhe në librat edhe në lojëra. Shumica e këtyre armiqve kanë qenë të mbinatyrshëm ose thjesht njerëz me qëllime të këqia. Në serial, Geralt do të ketë përballjen e tij me këta individë, por në fakt në serial nuk do të ketë një antagonist kryesor.
Në intervistën e saj Hissrich vazhdoi të thoshte: “Nuk është diçka që duhet të rrijë e fshehtë. Nuk ka një antagonist në The Witcher. Çfarë ne po eksplorojmë janë të gjitha nuancat e errëta që mund të marrim nga librat dhe si do ti vendosim ato në ekran.”
Përsa i përket personazheve, Hissrich tha se opinionet tona ndaj tyre mund të ndryshojnë nga fillimi deri në fund të tij. Personazhet që kujtojmë se do të na pëlqejnë në fillim, do të zëvendësohen nga të tjerë në fund.
“Personazhet me të cilat bëheni palë në fillim, mund të mos jenë ata me të cilët bëheni palë në fund. Personazhe që i urreni dhe duken të këqinj do të motivohen nga diçka humane dhe emocionale. Teksa po e shkruaja e kuptova që shikuesi do ti ndryshojë shpesh aleancat. Vazhdimisht do të përpiqeni ta vini veten në vend të personazheve dhe do mendoni se çfarë mund të bënit ju në një situatë të tillë. Mendoj se do të përfundoni duke patur shumë empati për personazhe që nuk ja u priste mendja.”
The Witcher supozohet të lançohet këtë vit. Gjithsesi një datë zyrtare lançimi ende mungon. Le të shpresojmë që kjo e fundit do të zbulohet në panelin e sotshëm të serialit në Comic-Con.