Super Mario Maker 2 në Switch do të vijë me plot veçori të reja

Do të ketë shumë harta e mjete të reja pune, por edhe një Story Mode

Kanë kaluar 4 vite që kur Super Mario Maker u prezantua nga Nintendo. Nuk pritej që loja pasardhëse e kësaj serie kaq popullore të vonohej kaq shumë, por siç thotë një shprehje, më mirë vonë se kurrë. Zhvilluesi japonez i vdeiolojërave ka dhënë më në fund çdo detaj mbi Super Mario Maker 2 Switch.

Super Mario Maker 2 për Switch u diskutua me detaje gjatë Nintendo Direct-it të fundit. Duket e çuditshme që një lojë kaq e rëndësishme për studion u zbulua kaq pak para E3 2019, sepse Nintendo fare mirë mund t’a kishte ruajtur zbulimin e saj për livestream-in e tyre gjatë E3. Megjithatë, nuk kemi pse të ankohemi.

Prezantimi i Nintendo-s na dha mundësinë t’i hidhnim sytë mbi një shumëllojshmëri detajesh e veçorish për Mario Maker-in e ri. Zhvilluesit prezantuan mjete të reja pune, si dhe një single player mode.

U zbulua shumë informacion për lojën e re Mario Maker. Zhvilluesit po prezantojnë mjete të reja pune, pjesë të reja si dhe veçori të tjera për krijuesit. Gjithashtu, po zhvillohet një story mode për Mario Maker. Ai mund të luhet offline, pra nuk keni nevojë t’a lidhni Switch-in tuaj me internetin. Detajet e para të historisë na tregojnë  një udhëtim që Mario do të ndërmarrë për të rindërtuar kështjellën e Princess Peach. Për të financuar këtë projekt të ri të tijin, ai duhet të mbledhë monedha.

Mario mund të mbledhë monedha duke pranuar punë të ndryshme nga tabela e lajmërimeve dhe duke kaluar nëpër pista të ndryshme. Story Mode ka mbi 100 pista të reja të krijuara nga vetë Nintendo.

Nintendo gjithashtu na prezantoi me shumë veçori të cilat do të jenë pjesë e lojës, ndër të cilat mund të përmendim blloqe dhe personazhe të rinj, tematika të reja për pistat, krijimi i pistave në stilin e Super Mario 3D World si dhe veçori të ndryshme të lidhura me co-op multiplayer. Gjithashtu, Nintendo tha se shumë surpiza të reja do të prezantohen gjatë rrugës. Loja do të lançohet në 28 qershor.