Facebook dëshiron të shtojë librarinë e lojërave të disponueshme për linjën e tyre Oculus VR dhe duket se kompania ka bindur Ubisoft që ti ndihmojë. Sipas një raportimi të ri, Facebook ka firmosur një marrveshje me Ubisoft për lojërat VR të Splinter Cell dhe Assassin’s Creed.
Vetë Mark Zuckerberg është i përfshirë në iniciativën për të sjellë më shumë lojëra ekskluzive në Oculus dhe sado që kjo nuk është konfirmuar 100% , implikohet se Facebook të paktën është duke i furnizuar pjesërisht këto lojëra.
Duhet patur parasysh që për momentin ky lajm nuk mund të merret si fakt i kryer, sepse asgjë nuk është konfirmuar as nga Facebook dhe as nga Ubisoft. Facebook gjithsesi ka reaguar ndaj deklaratës duke thënë:
“Reagimi i publikut ndaj Oculus Quest dhe rift S ka qenë fantastik. Nuk mund të komentojmë mbi bashkëpunimet tona, por do të vazhdojmë të fokusohemi në zgjerimin e librarisë së lojërave tona për Oculus për vitet në vijim.”
Pra nuk është një konfirmim, por as një mohim i gjithë këtij spekulimi. Ende nuk ka informacion se si do të strukturohen këto lojëra. Nëse do të jenë thjesht versione të riprodhuara VR, apo histori të reja mbetet ta zbulojë koha.
Momentalisht Facebook ka dy modele të Oculus në treg. Oculus Rift S dhe Oculus Quest. Përsa i përket lojërave që mendohet të shtohen, zgjedhja është mjaft interesante, por nuk e di sa të lumtur do të jenë fansat e Splinter Cell me një lojë VR.