Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds
2 prilli njihet në mbarë botën si Dita Ndërkombëtare për ndërgjegjësimin ndaj Autizmit. Jam e sigurt që gjithësecili prej jush që do e lexojë këtë artikull është hasur në një pikë ose një tjetër të jetës së tij me një individ që ka shfaqur simptomat ose është diagnostikuar me autizm. Se si ka qenë sjellia juaj ndaj tij nuk mund ta them, por mund të them se shpesh herë shoh që shoqëria, mbi të gjitha ajo Shqiptare nuk mban sjellien e duhur karshi këtij fenomeni.
Autizmi përkufizohet si një “çrregullim neurobiologjik që veçohet me vështirësi në komunikim, ndërveprim shoqëror e sjellje të përsëritura dhe rreze të kufizuar interesash.” Nuk mund të themi se nuk është një përkufizim i drejtë. Në fakt është diçka reale që e shohim dita ditës dhe ndonjëherë nuk e kuptojmë që e kemi përpara syve. Shumë elementë nga jeta e përditshme ndikojnë për mirë ose keq në individët e prekur me autizëm. Një nga dilemat dhe tematikat që vazhdon të diskutohet është prezenca e teknologjisë dhe video-lojërave në jetën e tyre dhe impakti që këto lënë.
Sipas statistikave 41.4% e fëmijëve dhe adoleshentëve të prekur me autizëm janë të prirur dhe të dhënë pas video-lojërave, krahasuar me 18% të fëmijëve dhe adoleshentëve normalë. Dukshëm pra preferohen shumë, por e gjithë ideja është te ndikimi që këto lënë pas. Argumentohet se shpeshherë video-lojërat mund të sjellin varësi dhe probleme te këto persona. Sigurisht që nuk flitet për problemet që do të haste një fëmijë normal. Në momentin kur vështirësite në komunikim dhe mungesa e bashkëpunimit në relata me njerëz të tjerë futet në lojë jo vetëm ky problem, por çdo lloj problemi merr përmasa më të mëdha. Në disa raste këta persona nuk duan të dalin nga dhoma, refuzojnë të dëgjojnë ose kalojnë edhe kriza paniku kur dalin jashtë dhomës së tyre.
Nga ana tjetër e medaljes kemi pikërisht të bukurën që kanë individë të tillë. Një rreze e kufizuar interesash në fund mund të dalë për më mirë. Nuk është ndonjë gjë e re, por njerëzit e prekur me forma të autizmit janë shumë inteligjentë dhe kanë një dhunti ose aftësi specifike që nuk i sheh shpesh në individët normalë. Nëse përqasja jonë ndaj fenomenit do të ndryshonte jam e sigurt që dita ditës do të shihnim më shumë raste ‘fundesh të lumtura’.
Në 2015 Microsoft nisi programin e punës për individët e prekur me autizëm dhe thjesht le të rikujtojmë që sot ky program është duke ia dalë shumë mirë dhe iu ka dhënë mundësinë shumë personave të talentuar, që në një pikë të jetës së tyre janë ndjerë të përjashtuar nga shoqëria, të shfrytëzojnë në maksimum dhuntinë e tyre.
Unë e di që ju nuk jeni Microsoft dhe nuk mund thjesht të nisni një nismë të tillë nga hiçi, por janë gjërat e vogla ato që lënë impaktin më të madh. Dua ta shmang atë pjesën ku shkruaj disa fjali sentimentale mbi mbështetien dhe përkrahien njerëzore, sepse janë gjëra bazë që gjithësecili prej nesh duhet ti ketë, në raport me këdo. Është e vërtetë se individët autikë hasin vështirësi të pafundme dhe ndonjëherë i përcjellin këto edhe në mjedisin rretheqark tyre, por gjithsesi është sjellia dhe qëndrimi ynë ai që duhet të përshtatet me këta të fundit.
Sot është Dita Ndërkombëtare e Autizmit, reflekto.
