Sony dhe Microsoft do të përballen në Gamescom 2019

Pas mungesës së Sony në E3 2019, duket se kompanitë do të shihen sy më sy në Gamescom 2019

Kur thua Sony dhe Microsoft mendja të shkon menjëherë në dy rivalë që qëndrojnë kokë më kokë mbi njëri-tjetrin dhe në fakt kjo është mëse e vërtetë. Si dy nga kokat kryesore të industrisë së gaming PlayStation dhe Xbox ka qenë gjithmonë dilema më e madhe mes lojtarëve. Pa hatërmbetje këtu ndaj fansave të Nintendo. Ajo është pjesë e rivalitetit, por kurrë në të njejtën mënyrë si dy konsolat e sipërpërmendura.

Ja ku jemi pra tani në atë periudhë kohore ku jemi mu në prag të konsolave të gjeneratës së ardhshme, duke pyetur veten se kush do të superojë këtë rradhë. Lajme dhe detaje janë zbuluar edhe për PlayStation 5 edhe për Xbox Scarlett, por ndonjëherë të shkon mendja të shohësh më shumë se thjesht aspektet teknike të konsolave, por vetë sjellien që dy kompanitë kryesore tregojnë ndaj tyre.

Kur Sony vendosi të mos paraqitej fare në E3 të gjithë menduam se Microsoft kishte avantazhin më të madh dhe realisht kompania na la mëse të kënaqur pas E3. Mungesa e Sony në këtë eveniment bombastik sigurisht që i ka kushtuar, por si një kompani e madhe e dinte se çfarë ishte zgjidhja më e mirë për të.

Gamescom 2019 nuk është kurrsesi në përmasat e E3 pastaj. Në fakt shumë do e konsideronin si diçka fare të lehtë krahasuar me çmenduritë që bëhen në E3. Gjithsesi ishte një fakt shumë interesant që ju bëri të gjithëve përshtypje në organizimin e këtij viti. Edhe Microsoft edhe PlayStation do të jenë aty, me shumë mundësi për të dhënë më shumë lajme për planet e tyre të 2019s e tutje.

Lajmi erdhi përmes Twitter, nga një përdorues që përmes disa materialeve promocionale, konfirmoi prezencën e të dyja palëve dhe të të gjithë kompanive pjesëmarrëse në fakt. Këtu përfshijmë Bethesda, 2K Games, Capcom, EA etj.

Microsoft është përpjekur vazhdimisht për të qenë prezent në Gamescom gjatë viteve të fundit, por lajmi i prezencës së Sony në të flet shumë, sepse siç e përmendëm edhe më sipër, kompania nuk u bë fare e gjallë në E3.

Nuk është çudi që të dëgjojmë më shumë lajme rreth PlayStation 5 dhe parametrave të hardware-it në Gamescom. E njejta gjë vlen edhe për “rivalin” e konsolës, Xbox Scarlett. Nuk jemi shumë të sigurtë që do të japin lajme aq shokuese sa ato të E3, por fundja nëse kanë vendosur të marrin pjesë, nuk besojmë se do të shkojnë duarbosh.

Gamescom 2019 do të mbahet në Cologne të Gjermanisë. Eventi do të nisë të martën e 20 gushtit dhe do të vazhdojë deri të shtunën e 24 gushtit. Mbetet të presim këtë periudhë kohore për të parë nëse këto parashikime do të dalin të vërteta.