Muajin që lamë pas, Apple zbuloi shërbimin e saj më të ri për gaming, Apple Arcade, që është praktikisht si Netflix por për lojëra. Pra përdoruesit e Apple paguajnë një tarifë mujore për të luajtur sa lojëra të duan në të. E dinim në këtë pikë që Apple ka qenë duke investuar shumë para për të bindur zhvilluesit që të bëjnë lojëra për këtë shërbim dhe këto lojëra supozohej të vinin njëkohësisht edhe në PC, por ky mund të mos jetë rasti në fjalë.
Sipas raportimeve, Apple po harxhon me miliona dollarë për ti siguruar lojëra ekskluzive shërbimit Apple Arcade. Ndonëse lojëra si e shumëpritura Beyond a Steel Sky do të vijë më vonë edhe për PC dhe konsola, do të ketë një periudhë mujore ekskluziviteti në shërbimin e Apple fillimisht.
Krahas Beyond a Steel Sky nga Revolution, studio si Disney, Sega, Lego, Konami, Snowman, Annapurna Interactive, WayForward dhe Klei Entertainment kanë lojëra që do të vijnë së shpejti në Apple Arcade dhe është e mundur që Apple të jetë duke planifikuar marrëveshje ekskluziviteti më të gjithë.
Në fakt taktika është mjaft e zgjuar. Është identike me atë të Epic në raport me Borderlands 3 përshembull. Në momentin kur je një hyrje e re në treg, mbi të gjitha me një shërbim si Apple Arcade, duhet të gjesh mënyra për ta tërhequr audiencën drejt teje.
Gjithsesi duke llogaritur që kompania vetë dhe studiot që po bëjnë lojëra për të, nuk kanë thënë asgjë deri më tani për ekskluzivitetin, nuk mund të jemi 100% të sigurt. Apple Arcade do të lançohet më vonë gjatë këtij viti dhe besoj se në atë pikë të gjithë do e zbulojmë të vërtetën.