Sekiro: Shadows Die Twice vështirësohet pas çdo here që ju e luani

Së bashku me rritjen e vështirësisë, duket se hisotria do të ketë disa përfundime, duke i dhënë lojës shumë vlerë përsëritjeje.

Sekiro: Shadows Die Twice duket se do të distancohet nga formula e Dark Souls, edhe pse është krijuar nga i njëjti zhvillues, FromSoftware. Por, njëra prej veçorive të serive do të vazhdojë të jetë pjesë e Sekiro. Siç u konfirmua nga drejtori kreativ i lojës, Sekiro do të jetë një eksperiencë tej mase e vështirë.

Kjo ishte çfarë Hidetaka Miyazaki, presidenti i FromSoftware e krijuesi i Sekiro, kishte për të thënë për lojën e re gjatë një interviste me mediat japoneze në Taipei Game Show. Gazetarët, së bashku me Miyazakin, folën për sistemin e ringjalljes në lojë, i cili i lejon lojtarët të ringjallen në të njëjtin vend ku ata vdiqën, por vetëm për një numër të limituar herësh. Miyazaki foli për mungesën e penalizimeve për ringjalljen dhe gjithashtu ndau me publikun informacione të cilat, në varësi të mendimit që keni mbi vështirësinë e Dark Souls, mund të interpretohen në mënyrë të mirë ose shumë, shumë të keqe.

“Ne nuk kemi përfshirë penalizime të mëdha në sistemin Kaisei të ringjalljes” sqaron Miyazaki. “Megjithatë, loja do të jetë ekstremisht e vështirë. Gjatë dyluftimeve midis ninxhave siç ne i imagjinojm, është gjithmonë rreziku i vdekjes dhe lojtarët do të jenë gjatë gjithë kohës të përqëndruar maksimalisht, duke kaluar nga një luftim emocionues në tjetrin. Për ta bërë këtë, përfunduam duke krijuar një lojë ku lojtari vdes shumë!“

Miyazaki gjithashtu konfirmon se loja do të vështirësohet sa herë që lojtari vendos ta riluajë lojën. Drejtuesi tha se FromSoftware i ka shtuar vlerën e riluajtjes lojës, duke bërë pjesë të saj në njëfarë mënyre funde të ndryshme, por gjithashtu konfirmoi se “çdo herë do të jetë akoma më e vështirë“. Megjithatë, Miyazaki nuk ju referua kësaj si New Game+ Mode, për të cilën Miyazaki foli disa muaj më parë duke thënë se ajo ishte ende duke marrë formë. Kjo veçori, edhe pse nuk është ekskluzive e lojërave të FromSoftware, është përdorur nga zhvilluesi gjatë serisë Dark Souls, por edhe në Bloodborne.

Sekiro: Shadows Die Twice do të lançohet në 15 mars në Playstation 4, Xbox One dhe PC. Më poshtë mund të ndiqni trailer-in: