Riot na jep pamjen e parë për Set 3 në Teamfight Tactics, Galaxies

Seti i ri në TFT pritet të vijë në mars

Lojtarët e Teamfight Tactics më në fund kanë mundësi të prezantohen me setin e tretë, Galaxies.

Dizenjuesi kryesor i TFT Mortdog, së bashku me Beernana, kanë folur më shumë mbi setin e ri në një postim. Zhvilluesit thanë se Galaxies do t’i vendosë lojtarët në mes të një lufte ndërgalaktike, si dhe do të sjellë, kampionë, traits, skin-e, borde, Little Legends dhe mekanika të reja.

Edhe pse zhvilluesit e Riot duket se janë të lumtur me sistemin e Elemental Hex në Rise of the Elements, kjo mekanikë do të zëvëndësohet me Galaxies.

Disa lojëra do të nisin normalisht, ndërsa disa të tjera do të zhvillohen në galaktika me rregulla të tjera. Neekoverse për shëmbull bën që lojtarët të nisin lojën me dy Neeko’s Help. Ndërkohë, në një galaktikë tjetër, karuseli i parë i lojës do të ketë vetëm 4-cost units.

Lojtarët nuk do të mund ta dinë se në çfarë galaksie do të jenë derisa loja të nisë, gjë që i detyron ata të ndryshojnë stilin e lojës në mënyrë të ngjashme si në Set 2. Zhvilluesit e TFT patën si qëllim të sillnin një mekanikë të qartë, por të ndryshueshme, e cila mund të zgjerohej gjatë sezonit. Edhe pse fillimisht do të ketë vetëm pak galaktika, më shumë do të shtohen dhe do të hiqen në vazhdim.

Set 3: Galaxies pritet të vijë gjatë marsit. Zhvilluesit e TFT do të japin më shumë informacion rreth tij gjatë javës së ardhshme.