Riot Games vendos të heqë një prej mode-ve të League of Legends

Me heqjen e Twisted Treeline, Teamfight Tactics do të bëhet një mode i përhershëm

Riot Games ka deklaruar zyrtarisht se do të heqë Twisted Treeline nga League of Legends, në një postim ku jep më shumë detaje mbi planet e së ardhmës për lojën.

Twisted Treeline është një hartë me 2 lane dhe luhet 3v3. Ajo ofron disa sende unike, por në vetvete ka të njëjtat mekanika thelbësore si Summoner’s Rift, pasi qëllimi i lojës mbetet të kalosh kullat për të shkatërruar Nexus-in e kundërshtarit.

Ky mode ka qënë pjesë e League of Legends që prej lançimit, por pas thuajse 7 vitesh Riot ka vendosur ta heqë atë nga loja, pasi interesi i pakët në këtë mode ka bërë që kohët e pritjes të jenë të gjata dhe eksperienca e përgjithshme PvP të mos jetë e kënaqshme për të gjithë lojtarët që luajnë në Twisted Treeline.

Twisted Treeline do të mbetet në lojë deri në fund të sezonit dhe lojtarët do të kenë akoma mundësi të marrin shpërblime nga ky mode. Megjithatë këtë vit skin-i Victorious nuk do të ketë një chroma specifike për Twisted Treeline, për të shmangur lojtarët që nuk e luajnë lojën në raste të tjera dhe thjesht po mundohen të marrin këtë skin.

Riot ka vendosur t’i ofrojë disa shpërblime lojtarëve të dedikuar të Twisted Treeline, të cilat ende nuk janë publikuar. Ato do të dhurohen në bazë të lojërave të luajtura përpara kësaj deklarate, për të vlerësuar në mënyrën e duhur lojtarët që e kanë luajtur vërtet këtë mode dhe jo ata të cilët thjesht kërkojnë shpërblimet.

Riot gjithashtu komentoi mbi disa nga mode-t e tjera të lojës. Ata konfirmuan se URF (Ultra Rapid Fire) do të kthehet në një farë mënyre gjatë këtij viti dhe se Nexus Blitz do vazhdojë të shfaqet 2 herë në vit. Ndërkohë, ARAM do të mirëmbahet me ndryshime specifike për të çdo disa patch-e dhe me ndryshime më të mëdha një herë në vit.

Në këtë postim u konfirmua gjithashtu se Teamfight Tactics do të jetë pjesë e përhershme e lojës. Duke parë suksesin e autobattler-it të Riot, ky vendim nuk ishte aspak i papritur, po padyshim që konfirmimi që ajo nuk do të ketë të njëjtin fat si Twisted Treeline i gëzon fansat.