Resident Evil 3 Remake është deri më tani në një fillim fantastik. Kjo nëse do të bazohemi nga numrat e shitjeve që ka patur loja. Zhvilluesi Capcom ka zbuluar se loja ka shitur 2 milionë njësi.
Në një deklaratë të postuar nga Capcom, studioja zbulon se kjo shifër masive refelekton shitjet e lojës vetëm në pesë ditët e para pas lançimit të saj në datë 3 prill. Duke qenë se tani jemi rreth dhjetë ditë pas lançimit, ka gjasa që shifra të jetë edhe më e lartë se aq. Brenda 2 milionshit përfshihen shitjet e bëra në PlayStation 4 dhe në familjen e paisjeve të Xbox, pra vetë konsolën dhe shitjet në PC. Deri më tani shitjet dixhitale zënë gjysmën e shitjeve totale.
Sa për t’i vënë gjërat pak më në kontekst, loja origjinale e Resident Evil 3 ka shitur rreth 3.5 milionë njësi në total, një shifër që remake-u i saj po e kap brenda pak ditësh. Resident Evil 2 Remake, që erdhi në janar të vitit të shkuar, tani ka rreth 6.5 milionë njësi të shitura në total.