Remake-u i Ubisoft për Prince of Persia: The Sands of Time është vonuar sërish. Pasi u shty nga 20 janari në 18 mars të këtij viti, zhvilluesi njoftoi së fundmi se loja ka ende nevojë për më shumë kohë. Se kur do të jetë kjo, Ubisoft nuk është akoma gati që ta thotë.
“Kemi marrë vendimin për të shtyrë lançimin e Prince of Persia: The Sands of Time Remake për një datë të mëvonshme,” shpjegoi kompania në Twitter. “Kjo kohë shtesë e zhvillimit do i nxisë ekipet tona që të sjellin një remake që ndjehet i freskët, teksa i qëndron besnik origjinalit.”
Vonesa e kaluar e lojës asociohej me pandeminë, duke e quajtur 2020 “një vit si asnjë tjetër më parë.” Fatkeqësisht nuk i dihet se kur gjërat do të kthehen në normalitet, ndaj edhe Ubisoft heziton të thotë një datë fikse.
E njoftuar në shtatorin e kaluar, Sands of Time do të rindërtohet nga fillimi duke përdorur Assassin’s Creed engine të zhvilluesit. Ky remake do të fokusohet kryesisht në ndryshimin e grafikave dhe është loja e parë e Ubi nën drejtimin e studiove në Indi.
Ende nuk e dimë se kur do të vijë loja, por kur të vijë ajo do të jetë ekskluzive e Epic Games dhe Ubisoft Store.