Remake i Resident Evil 3 do të vijë në prill të 2020

Remake do të vijë së bashku me Resident Evil: Resistance në PlayStation 4, Xbox One dhe Steam

Zërat që kanë kohë që qarkullojnë se një remake i Resident Evil 3 do të vinte tashmë janë konfirmuar, pasi loja u zbulua zyrtarisht gjatë State of Play të Playstation në 10 dhjetor. Loja do të vijë në PlayStation 4, Xbox One dhe PC në 3 prill 2020.

Në mënyrë të ngjashme me remake-un e suksesshëm të Resident Evil 2 të lançuar këtë vit, Resident Evil 3 modernizon lojën e tretë të serisë survival-horror, duke hequr këndet e fiksuara të kamerës dhe duke sjellë një pamje third-person të protagonistes Jill Valentine. Trailer-i i zbulimit, të cilin mund ta shihni më poshtë, tregon heroinën e lojës duke vrapuar në një ndërtesë ndërkohë që ndiqet nga antagonisti Nemesis, ndërkohë që pjesa tjetër e trailer-it fokusohet tek historia dhe personazhet.

Resident Evil 3 zhvillohet gjatë një epidemie të T-virus në Racoon City, pak përpara ngjarjeve dhe pas ngjarjeve të Resident Evil 2. Loja u dallua nga paraardhëset e saj kur u lançua në 1999 pasi prezantoi Nemesis, një armë biologjike humanoide që ju ndjek gjatë lojës. Tematika horror e lojës dhe veçori të tjera që pritet të shtohen do të vijnë në jetë me anë të RE Engine, i cili u përdor më parë për Resident Evil 7: Biohazard, Resident Evil 2 dhe Devil May Cry 5, duke premtuar që mekanikat e gameplay-t të Resident Evil 3 të modernizohen.

Surprizë është fakti që Resident Evil 3 gjithashtu do të vijë së bashku me lojën co-op Resident Evil Resistance, një lojë asimetrike 4v1 e cila u zbulua fillimisht si Project Resistance në Tokyo Game Show këtë vit. Katër të mbijetuar duhet të punojnë së bashku duke përdorur aftësitë dhe armët e tyre unike për t’i shpëtuar një eksperimenti të kontrolluar nga një lojtar që luan rolin e Mastermind. Mastermind mund të manipulojë mjedisin dhe mban letra të cilat e lejojnë atë të vendosë kurthe dhe krijesa vdekjeprurëse, si dhe të kontrollojë armë biologjike elitare si G-Birkin dhe Tyrant.

Kushdo që bën pre-order Resident Evil 3 përpara lançimit në 3 prill 2020 do të marrë një Classic Costume Pack ekskluziv që përfshin dizajnin origjinal të Jill Valentine dhe një model flokësh për Carlos Oliveira.