Regjizori i Sonic The Hedgegog premton ta ndryshojë pamjen e Sonic

Interneti mbart një fuqi masive

Jo më larg se para pak ditësh u publikua traileri i adaptimit në film të videolojës Sonic The Hedgehog dhe auchh, njerëzit nuk ishin aspak të lumtur me mënyrën se si e kishin realizuar personazhin e Sonic. Këmbët, sytë, dhëmbët, asgjë nuk ishte siç duhej, kushdo që ka luajtur një herë videolojërat mund tjua thotë këtë. Gjithsesi pas 48 orëve me kritika të vazhdueshme për filmin tij, regjizori i siguroi të gjithë fansat se paraqitja e Sonic do të ndryshohej.

“Ju faleminderit për suportin dhe kritikën. Mesazhi është i qartë.. nuk jeni të kënaqur me dizajnin dhe doni ndryshime. Do e bëjmë të mundur. Të gjithë në Paramount dhe Sega janë përkushtuar plotësisht që ta çojnë këtë personazh në formën e tij më të mirë.”

Publikimi i filmit është vetëm gjashtë muaj larg, ndaj qartazi Jeff Fowler nuk po tallet kur thotë se duhet ta rregullojnë shpejt (#gottafixfast). Zakonisht filma të tillë kanë rreth një vit kohë për të krijuar dhe rregulluar të tilla efekte dhe me sa po kuptojmë ne krijuesit e filmit kanë menduar që modeli i Sonic ishte shumë i mirë përpara se ta publikonin trailerin.

Gjithsesi interneti nuk rri dot kurrë pa vënë dorë vetë. Artistë të ndryshëm e kanë marrë vetë përsipër ta rimodelojnë Sonic për t’ju dhënë një ide regjizorëve se në çfarë drejtimi duhet të shkojnë.

Kaq pranë ardhjes së filmit nuk e dimë nëse realisht do ia dalin për ti ndryshuar grafikat e personazhit. Gjithsesi duhet marrë parasysh që në fillim që të kthesh një videolojë në film ka kusuret e veta. Në fund të ditës, thjesht le të shpresojmë që Sonic do të rregullohet, por mbi të gjitha që audienca e filmit të jetë e kënaqur me të.