Është e padiskutueshme që PUBG Mobile është një nga lojërat më të mëdha mobile të publikuara ndonjëherë, ndaj nuk është shumë çudi të dëgjosh se loja është ajo që merr fitimet më të mëdha përmes lojërave battle royale mobile në treg. Për këtë mund të falenderohet Tencent Games që e solli PUBG Mobile në Kinë para dy muajsh me versionin jo të dhunshëm të quajtur Game for Peace.
Shpenzimet e lojtarëve u rritën me $167 milion. Kjo e bën PUBG lojën numër 1 përsa i përket fitimeve për të tretin muaj rresht, sipas përllogaritjeve nga Sensor Tower.
Mund të themi pa frikë se është Kina arsyeja për rritjen e menjëhershme të këtyre fitimeve, pasi kanë kontribuar në rreth %30 shtim të tyre për vetëm dy muaj. Gjithsesi edhe nëse nuk e llogarisim Kinën, loja sërish ka patur rritje të fitimeve të saj në krahasim me vitin e shkuar. Në këtë pikë PUBG Mobile është përpara Fortnite të Epic Games dhe Knives Out të NetEase.
Gjithashtu ja vlen të shtojmë se në këtë përllogaritje, nuk janë përfshirë të ardhurat e marra nga PUBG Lite. Kjo e fundit është loja që, siç sugjeron edhe emri i saj, është më e lehtë dhe i përshtatet telefonave me parametra më të ulëta se mesatarja.
Duke qenë se loja ka fituar popullaritet masiv në shumë kontinente, ka marrë edhe anën tjetër pak më negative të medaljes, duke u ndaluar nga qeveria në disa vende. Prapëseprapë në fund të ditës, është PUBG ajo që po bën me miliona dollarë në muaj, ndaj nuk do të thonim që po e merr edhe aq keq situatën.