Sipas presidentit të Inti Creates, Takuya Aizu, PlayStation 5 dhe Xbox Scarlett duhet të mësojnë nga Nintendo Switch. Në një intervistë, ai analizoi ecurinë dhe shitjen e konsolave, eskluzivitetin e gjeneratës së ardhshme dhe pritshmëritë që duhet të kemi prej tyre.
Sipas Aizu, Nintendo Switch ja doli të ishte një sukses i madh, falë aftësisë unike që ofronte për të luajtur lojëra në televizor dhe mënyrë praktike. Aizu beson se konsolat e ardhshme të Sony dhe Microsoft duhet të ofrojnë diçka të ngjashme me Switch nëse duan të kenë sukses.
Ai vazhdoi të shprehej duke thënë se kjo do të ishte e vështirë për tu realizuar nga konsolat ardhshme, pasi lojërat ekskluzive janë në rënie.
“Mendoj se do të jetë mjaft e vështirë për konsolat e reja , sepse në këtë pikë ku ndodhemi, ekskluziviteti po vdes. Ka shumë lojëra që po dalin në platforma të ndryshme dhe edhe nëse në fillim këto lojëra nuk e bëjnë këtë gjë, më vonë në të ardhmen do e bëjnë.”
Aizu vijoi të thonte se PlayStation 5 dhe Xbox Scarlett duhet të vijnë me lojëra ekskluzive mjaft të mira në lançimin e tyre nëse duan që ti kënaqin fansat.
“Kur këto kompani nxjerrin konsola të rinj në treg, mendoj se një nga gjërat më të rëndësishme për ta është që të kenë sa më shumë lojëra ekskluzive në lançim. Nëse nuk e kanë këtë, probabiliteti që të mos kenë një lançim të mirë është i lartë.”
Gjithsesi, ai riformuloi se Nintendo Switch ofron shumë veçori të reja për të tërhequr klientët drejt tij.
“Pra cilatdo qofshin këto sisteme të reja, do të duhet të ofrohet një eksperiencë që mund të merret vetëm duke e blerë. Mendoj se elementi i unikes është më i rëndësishëm se kurrë tani, mbi të gjitha pas standarteve që ka vënë Nintendo. Atyre do ju duhet diçka tjetër për ti veçuar. Nëse do e dija se çfarë ju duhet do shkoja që tani te Sony ose Microsoft për t’ja u shitur si ide.”
Me pak fjalë, ideja që Aizu prezanton është se Sony dhe Microsoft duhet të fillojnë të sjellin veçori të reja nëse duan të kenë sukses. Nuk ka asgjë të keqe në këtë strategji, sepse fundja e gjithë ideja është që konsolat të jenë të veçantë në mënyrën e tyre.
Do të jetë interesante të shohim se çfarë ekzaktësisht do të na sjellin në 2020n, PlayStation 5 dhe XboxScarlett. Microsoft tashmë e ka konfirmuar se Xbox Scarlett do të vijë bashkë me lançimin e Halo Infinite. Sony nga ana tjetër nuk ka konfirmuar asnjë lojë ekskluzive që mund të vjë direkt me konsolën PS5.