Bëhuni gati për një përjetim komplet tjetër të piramidës. Sigurisht që ato ngjitjet deri në majë, në tërë atë pisllëk, me një pamje fantastike të qytetit të Tiranës, nuk do të harrohen kurrë, por ka ardhur koha për një ndryshim. Së fundmi kanë filluar punimet për rikonstruktimin e saj.
MVRDV është një studio arkitekture e bazuar në Hollandë. Punët e saj të mëparëshme mund t’i keni parë në qendrën tregtare Toptani, sado që aplikimi final i projektit ishte pak më ndryshe nga ideja fillestare.
Kompania ka zbuluar dizajnin e saj për Piramidën e Tiranës. Ndërtesa do të marrë një frymë shumë më gjithë-përfshirëse, duke u transformuar në një qendër multi-funksionale për teknologjinë, kulturën dhe artin.
Pjesa e katit përdhe do të jetë e hapur nga të gjitha anët, duke e ftuar publikun të marrë pjesë në të gjitha funksionet edukative dhe argëtuese, që do të zhvillohen aty. Fasada dhe çatia do të jenë të aksesueshme, me shkallë këtë rradhë dhe jo me rampa që i ngjisim ne për argëtim.
Qëllimi është një ajo të integrohet me elementët urbanë. E njejta logjikë aplikohet edhe në pjesën e brendshme, e cila përmes gjelbërimit do të përziehet me ambientet rrethuese, duke shtuar edhe një farë monumentaliteti më të theksuar, teksa shëtit brenda saj.
Gjithmonë duhet marrë parasysh fakti që projekte të tilla, shpesh pësojnë modifikime rrugës, por prapë mezi po presim për hapjen e një godine të tillë, e cila padyshim që do të theksojë edhe më shumë rolin e saj si një landmark në qytetin e Tiranës.