PewDiePie dhuron $10,000 për bamirësi në kujtim të Etika

Fitimet erdhën nga një Stream i mbajtur me Jack Black në Minecraft, për të rritur ndërgjegjësimin ndaj shëndetit mendor.

PewDiePie dhe Jack Black së fundmi u bashkuan për të mbajtur një livestream të Minecraft në YouTube dhe DLive. Qëllimi i këtij bashkëpunimi ishte që të mblidhnin para për bamirësinë Take This. Kjo e fundit ka si qëllim rritjen e sensibilizimit ndaj shëndetit mendor brenda komunitetit të gaming. PewDiePie bëri një dhurim prej $10,000 në kujtim të të ndjerit Etika.

Etika ndërroi jetë në një mënyrë tregjike prej vetëvrasjes në qershor, pas betejave të shumta me shëndetin mendor. Stream-i i PewDiePie dhe Jack Black u mbajt për të rritur sensibilizimin ndaj këtij fenomeni. Në Twitch dhe YouTube ka shumë figura që për shkak të presionit të ushtruar në ta, vuajnë pasoja të rënda në shëndetin mendor.

PewDiePie dhe Jack Black arritën të mblidhnin $30,479 në dy ditë. Stream-i i tyre transmetohej live në YouTube dhe në platformën DLive. Qëllimi ishte mbledhja e $30,000 dhe pasi kjo shifër u arrit, ishte vetë Felix ai që shtoi edhe një tjetër $10,000 për shumën.

Vdekja e Etika shokoi një pjesë të madhe të komunitetit të gaming, duke tërhequr vëmendje të lartë në pasojat që mund të sjellin problemet e shëndetit mendor.

Etika ishte i njohur kryesisht për stream-et e tij dhe videot e reagimit. Pak muaj para vdekjes së tij, ndjekësit e tij ishin shqetësuar, pasi ai kishte treguar një sjellje anormale, ku mund të përfshijmë arrestimin e tij nga NYPD dhe broadcast-in e gjithë ngjarjes në instagram. Më vonë ai postoi një video ku kërkonte ndjesë dhe ku hapej publikisht për problemet që po haste me shëndetin mendor.

“Përgjatë viteve të fundit, të famshmin, streamer-at, YouTuber-at dhe shumë figura të tjera publike janë përballur me një presion të tmerrshëm nga ana e publikut që ka sjellë probleme të theksuara në shëndetin e tyre mendor. Shumë prej tyre janë të ekspozuar dhe të pambrojtur ndaj sfidave që mediat sociale kanë sjellë për mirëqënien mendore.” Shkruan përshkrimi i stream-it të Black dhe PewDiePie.

Fitimet e marra nga kjo bamirësi do të shkojnë për Take This, një organizatë jo fitimprurëse që ka si qëllim të eleminojë problemin e shëndetit mendor në komunitetin e industrisë së gaming.