Në eventin e mbajtur nga Xbox përpara disa ditësh, na u premtuar një pamje e parë e gameplay-it të Assassin’s Creed Valhalla. Problemi ishte që ajo çfarë u tregua gjatë këtij eventi zor se mund të quhej gameplay, pasi lojtarët morën më shumë pamje kinematografike të skenave të lojës. Kjo sigurisht që i la lojtarët e pakënaqur.
Përfaqësuesit te Xbox dhe Ubisoft i kanë pranuar kritikat. Aaron Greenberg, nga ekipi i marketingut të Xbox, tha në Twitter se qartazi kishin vendosur disa pritshmëri të gabuara dhe se e kishin vlerësuar të gjithë feedbackun e marrë nga situata.
Në mënyrë të ngjashme, drejtori krijues i Assassin’s Creed Valhalla, Ashraf Ismail tha se fansat me të drejtë meritonin të shikonin më shumë. Ai vazhdoi duke thënë se kanë një fushatë të gjatë marketingu para, ku fansat do të shohin më shumë gameplay dhe do të marrin më shumë informacion për lojën.
Eventi i Xbox në fakt kishte brenda shumë informacione se si do të vinin lojërat në Xbox Series X, por nuk arriti të sqaronte mirë se çfarë do i identifikonte ato si “të gjeneratës së ardhshme”.