Përdoruesit thonë se ata e kanë mbajtur iPhone 11 me kujdes
Përdoruesit thonë se ata e kanë mbajtur iPhone 11 me kujdes
Kur u zbuluan iPhone-t e 2019, Apple u krenua me faktin se Super Retina XDR i iPhone 11 Pro dhe iPhone 11 Pro Max janë ekranet më të avancuar ndonjëherë në një iPhone. Kompania gjithashtu tha se kjo dyshe kishte xhamin më të fortë ndonjëherë në një smartphone. Megjithatë, vetëm pak javë kanë kaluar që prej lançimit të serisë më të fundit dhe forumet online janë mbushur me njerëz që ankohen për gërvishtjen e ekraneve të iPhone 11. Dikush do të mendonte se nëse blen diçka me logon e Apple, do të marrësh një produkt me kualitet, por duket se kjo gjë nuk ka ndodhur.
Përdorues të ndryshëm të acaruar janë drejtuar online për të folur për gërvishtjet e ekranit të iPhone 11. Ajo që është më surprizuese është fakti se këta përdorues thonë që këto shenja u shfaqën nga hiçi. Ata thonë se nuk i kanë hedhur dhe nuk i kanë vendosur telefonat e tyre në asnjë sipërfaqe të ashpër. Kjo do të thotë se mund të fusësh një telefon në gjendje perfekte në xhep dhe kur ta nxjerrësh atë mos të jetë dhe aq perfekt. Gërvishtjet mund të shfaqen vetëm 24 orë pas blerjes, sipas historive të publikuara në forumin e Apple.
Përdoruesit që janë ankuar për gërvishtjet e ekranit të iPhone 11 gjithashtu thonë se nuk e kanë hasur këtë problem me modelet më të vjetra, me disa që thonë se janë të detyruar të blejnë AppleCare për të rregulluar ekranin. Përpara se Apple të investigojë këtë problem, është i vështirë të gjendet shkaku i këtyre shenjave. Mbase mund të jetë vetëm një numër i vogël telefonash i prekur, pasi disa teste tregojnë se ekrani është mjaft i fortë. Megjithatë, nëse ky problem është i përhapur, me shumë mundësi kompania do të ofrojë një program riparimi siç ka ndodhur dhe më parë.
Megjithatë, familja e iPhone në 2019 po shitet mjaft mirë, prandaj gjëja e fundit që Apple do të donte do të ishte publiciteti i keq dhe do të prishte vazhdimësinë e mirë të shitjeve.