Media sociale është diçka që kohët e sotme nuk ke nga i shmangesh. Është një mënyrë e mirë për të kaluar kohën, për tu argëtuar, për të parë meme, për të folur me njerëzit e afërt dhe për disa të tjerë, edhe për të matur vetëbesimin përmes numrit të likes.
Okay ajo e fundit është një lloj sjelljeje pakëz toksike që ka kapur komunitetin kohët e fundit. Njerëzit fiksohen me numrin e likes. E krahasojnë veten me të tjerët dhe lejojnë që disa shifra idiote të ndikojnë në vetëvlerësimin e tyre.
Kjo është pikërisht arsyeja pse Instagram ka testuar heqjen e numrit të likes në një postim dhe tani duket se edhe Facebook është duke ndjekur të njejtat hapa. Qëllimi i metodës është që të vlerësohet ajo çfarë postohet dhe jo popullariteti i një adrese ose profili.
Ishte Jane Manchun Wong ajo që zbuloi se Facebook po përpiqej ta zhdukte numrin e likes në paisjet Android.
Kur u pyet për këtë situatë, Facebook konfirmoi se Wong kishte të drejtë në atë që kishte zbuluar, por theksoi se testimet e kësaj taktike mbi përdoruesit e Facebook ende nuk kanë filluar.
Duhet të kemi parasysh se testimet që Instagram po bën me zhdukjen e numrit të likes nëpër postime janë të shumta, por njëkohësisht të limituara në vetëm shtatë vende. Nëse kjo taktikë do të ndiqet më vonë si një strategji për çdo media sociale mbetet ta shohim.
Ka disa njerëz që mendojnë se kjo do të ishte një lëvizje e gabuar nga ana e Instagram ose Facebook. Sado që disa individë tregojnë një sjellie obsesive me numrin e likes, të tjerë i përdorin ato si një metodë për të konkuruar me të tjerët dhe për tu përmirësuar në një fushë të caktuar. Në kategorinë e fundit përfshihen kryesisht adresat e personave publikë ose të bizneseve të caktuara.
Po ju si mendoni, a duhet të hiqet numri i likes në Instagram dhe Facebook, apo duhet të qëndrojë aty?