Nvidia shton Control në GeForce Now dhe premton lojëra të reja çdo javë

Nvidia thotë se shërbimi cloud gaming i GeForce Now do të fillojë të shtojë lojëra të reja çdo të enjte, duke filluar me lojën më të fundit të Remedy Entertainment, Control.

Njoftimi ishte një copëz lajmi i mirë për platformën deri diku kontraversiale, e cila ka parë publishers si Activision Blizzard, Bethesda Softworks dhe 2K Games të tërheqin të gjithë libraritë e tyre që kur ajo doli nga beta në fillim të shkurtit. Një pjesë e marrëveshjes nënkupton se Control gjithashtu mund të luhet në GeForce Now, duke përdorur kartat RTX të Nvidia, të cilat aktivizojnë efekte ray tracing për grafika më realistike.

Nuk është plotësisht e qartë se si Nvidia ja doli të merrte Control, por ndoshta ka të bëjë pak me CEO e Epic Games, Tim Sweeney, i cili e ka mbështetur publikisht platformën.

Control është momentalisht ekskluzive e Epic Games Store në PC dhe Epic së fundmi siguroi edhe të drejtat e publikimit për lojërat e ardhshme të Remedy Entertainment. Mund të themi me siguri se Epic, Remedy dhe Nvidia janë në terma të mirë përsa i përket GeForce Now.

E njejta gjë nuk mund të thuhet edhe për kompani të tjera që janë stepur nga shërbimi. Në momentin që Nvidia filloi të kërkonte $5 për GeForce Now në shkurt, u bë e qartë se shumë publishers nuk ishin të informuar.

Nvidia thotë se krahas Control, gjithashtu do të shtojë Arma 2: Operation Arrowhead, Danganronpa: Trigger Happy Havoc, Dungeons 3, Headsnatchers, IL-2 Sturmovik: Battle of Stalingrad, Jagged Alliance 2 – Wildfire dhe The Guild 3.