Nuk do të ketë Game Over në Death Stranding

Siç mund ta keni kuptuar deri tani, Death Stranding nuk është si video lojërat e tjera. Jo vetëm që zhvilluesit deklarojnë se klasifikohet në një zhanër komplet tjetër, por disa nga mekanikat e lojës na habisin. Me çfarë dihet deri tani, Death Stranding nuk do të ketë Game Over dhe koncepti pas kësaj idejeje është gjenial.

Në një intervistë të mbajtur së fundmi, Hideo Kojima, mendja pas Death Stranding, ka folur për çfarë ndodh pasi ju vdisni në lojë. Sipas tij nuk ka një ekran që do të thotë Game Over në Death Stranding, por përkundrazi, ju do të përjetoni ndryshime reale në botën rreth e qark jush. Kemi parë disa lojëra që e injorojnë komplet faktin se historia duhet të ketë një rrjedhë organike, një rrjedhë që ndikohet nga vdekja e një personazhi.

Në Death Stranding, Game Over është një tip mini-loje në vetëvete, në të cilën ju do e gjeni veten në “ocean space”, një zonë që e kemi parë edhe në trailer-at e mëparshëm. Aty ju duhet të kërkoni për trupin dhe paisjet tuaja që të ktheheni sërish në botën reale. Gjatë asaj kohe ndryshime do të ndodhin në botën që ju latë pas dhe gjërat do të rrjedhin sikur të mos kishte ndodhur asgjë. Shikoni trailerin e fundit në 5:40 për ta kuptuar më mirë “ocean space”.

Për të mbështetur më mirë konceptin pas mungesës së Game Over në Death Stranding, Kojima dha pak më shumë informacion rreth Void Outs. Ne praktikisht dimë se këto janë tip krateresh në botën e lojës. Ato do të shfaqen sa herë që Sam të hahet nga krijesat demonike. Krateri do ti bëjë të gjitha ndërtesat dhe infrastrukturën në atë zonë të zhduken. Ky krater do të jetë i dukshëm vetëm në botën tuaj, por me kalimin e kohës shiu do e rikthejë terrenin që mungon dhe lojtarët do të ndërtojnë mbi të.

Në këtë pikë, e dimë ekzaktësisht se çfarë ndodh kur vdes prej forcave të mbinatyrshme, por çfarë do të ndodhi kur njerëzit të sulmojnë dhe në një pikë të pashmangshme të të vrasin? Mund të presim që Sam të teleportohet prapë në “ocean space.” Gjithsesi a do të ketë pasoja për këtë?

Mbetet të presim dhe të shohim se si do të duket loja pasi të lançohet në datë 8 nëntor nga Kojima Productions, ekskluzivisht për PS4.