Njerëzit po zbulojnë vendet e Red Dead Redemption 2 në jetën reale

Rreth dy vite pas lançimit të Red Dead Redemption 2, lojtarët ende janë duke gjendur vende në jetën reale, që kanë frymëzuar disa nga vendet e lojës.

Një thread në GTA Forums i titulluar: “Mapping Red Dead Redemption2! Landmark Analysis Thread” ka qenë aktiv që në tetor të 2016, një kohë kur ende po spekulohej se cilat pjesë të Amerikës do të frymëzonin hartën e Red Dead Redemption 2.

Red Dead Redemption 2 shtrihet përgjatë pesë shteteve të sajuara të Amerikës dhe është shumë e thjeshtë të kuptosh se nga cili rajon i SHBA janë frymëzuar. Lemoyne është një rimishërim i shteteve juglindore si Luisiana dhe Mississippi, West Elizabeth i përngjan pjesëve të Texas ku bëhet lidhja me Oklahoma dhe Ne Austin duket si Arizona dhe New Mexico.

Gjetja e strukturave që duken thuajse identike me ato të përdorura në Red Dead Redemption 2 pastaj, ndihmon në lidhjen edhe më të mirë të vendeve që zhvilluesit e lojës kanë përdorur për hartën e RDR2.

Këto pamje janë kapur nga përdoruesi i këtij forumi koeklin, i cili ndau foto krah për krah të vendeve në Red Dead Redemption 2 dhe lokacioneve në jetën reale. Duke marrë parasysh sa e madhe është harta e Red Dead Redemption 2, ka gjasa që do të shohim gjithmonë e më shumë vende të lojës që janë frymëzuar nga pamje reale.