Një lojë e re Crash Bandicoot mund të vijë së shpejti

Çfarë nostalgjie!

Ka kohë që qarkullojnë zëra se një lojë e re Crash Bandicoot është afër dhe duket se ato vetëm po shtohen. Disa influencers në mediat sociale kanë marrë merch me Crash Bandicoot papritur dhe kjo lëvizje përputhet me një tjetër strategji marketingu gjatë vitit të kaluar.

Dhjetorin e kaluar, disa influencers morrën biskota Krishtlindjesh me Crash Bandicoot përpara zbulimit të Crash Team Racing në Game Awards. Këtë rradhë, influencers kanë marrë figura Funko Pop të Crash, zbukurime për pemën dhe figura aksioni me kapele Babagjyshi. Ka zëra që thonë se këto dhurata janë një shenjë se një lojë e re, e quajtur Crash Bandicoot Worlds, do të zbulohet së shpejti.

Duhet thënë se i gjithë ky informacion është ende jo i besueshëm, por të gjithë zërat të çojnë të mendosh se një lojë e re Crash Bandicoot do të vijë, edhe pse asgjë nuk është konfirmuar zyrtarisht.

Ka dy mundësi kryesore se kur kjo lojë do të zbulohet. E para është në evenimentin vjetor Game Awards në 12 dhjetor, ndërkohë që tjetra është gjatë State of Play të Sony, e cila do të zhvillohet në 10 dhjetor.

Nuk do të qe aspak e papritur që një lojë e re Crash të zbulohej në Game Awards, pasi është thënë se të paktën 10 lojëra do të zbulohen në Game Awards. Megjithatë, nëse loja e re Crash është ekskluzive për Playstation, atëherë me shumë mundësi ajo do të zbulohet në State of Play.