Ninja hedh shenja drejt një bashkëpunimi të madh me Microsoft

A mund të ketë ky bashkëpunim lidhje me Halo?

Streamer-i Tyler ‘Ninja‘ Blevins, i cili kaloi në Mixer më herët gjatë gushtit, po hedh tashmë shenja drejt një lajmërimi të madh me Microsoft. Lëvizja e Ninja drejt Mixer surprizoi shumë njerëz, por duke e menduar pak më thellë çështjen, shumë menduan se ai do të bashkëpunonte me Microsoft në një mënyrë tjetër përveç streaming.

Përpara se të bëhej sinonimi i fjalës Fortnite, Ninja ishte një lojtar profesionist i Halo, që në vetvete është një seri ekskluzive e Microsoft. Për këtë arsye, fansat kanë kohë që pyesin veten nëse diçka po bëhet gati pas kuintave për prezantimin e Halo: Infinite.

Ninja zbuloi se një lajmërim së bashku me Microsoft do të vinte së shpejti, por ai nuk dha ende shumë detaje, të cilat do të vijnë më vonë gjatë ditës së sotme.

“Microsoft po bën gati një surprizë për ju. Kjo është arsyeja pse ende nuk kam bërë stream por do e zbuloj nesër.“

Në fund të gushtit, Ninja bëri një vizitë tek zyrat qëndrore të Microsoft dhe hëngri drekë me shumë prej njerëzve të rëndësishëm të Microsoft, përfshirë këtu drejtorin e Xbox Phil Spencer, prandaj një bashkëpunim ishte thuajse i sigurt në atë pikë.

Askush ende nuk e di me siguri se çfarë ky bashkëpunim do të jetë me siguri, por nuk do të na duhet të presim shumë për ta zbuluar. Ndërkohë, ne padyshim duhet të japim dhe disa prej mendimeve tona.

Halo: The Master Chief Collection pritet të vijë në PC gjatë këtij viti duke nisur nga Halo: Reach, prandaj Microsoft mund të përdorë Ninja për të reklamuar lançimin e lojës, gjë e cila duket shumë e mundur. Gjithashtu ekziston mundësia që Ninja të bëjë stream Gears 5, një tjetër lojë ekskluzive e Microsoft që do të vijë këtë shtator.