Ninja do të mbahet mend si “gameri më i madh i të gjitha kohërave”

Koncepti i famës në gaming është pak i ri së fundmi. Nëse dikur zhvilluesit legjendarë si Shigeru Miyamoto ose rekordmena si Billy Mitchell ishin gjëja më e përafërt me një të famshëm në botën e gaming, eSports dhe streaming i kanë çuar gjërat në një drejtim, që deri para një dekade dukej i pamundur.

Tanimë ka figura që janë shumë herë më të njohura se emrat e mësipërm dhe Tyler “Ninja” Blevins është një prej tyre. Në moshën 28 vjeçare, streamer-i dhe fytyra kryesore e Mixer ka ndërtuar një trashëgimi mjaft mbreslënëse. Gjithsesi, është e qartë që Ninja i ka vënë qëllimet edhe më lart. Gjatë një interviste ai u shpreh se ka si qëllim të njihet si gamer-i më i madh i të gjitha kohërave.

“Dua të mbahem mend si një nga gamer-at më të mëdhenj të të gjitha kohërave, në mos më i madhi. Gjithsesi, kjo mund të mos ndodhë, sepse sërish ne nuk e dimë se cilat janë elementet që bëjnë gamer-in më të mirë.”

Ninja ngre një argument interesant këtu. Përgjatë intervistës, streameri foli për të famshëm si The Rock dhe David Beckham, duke i quajtur të dy “të paprekshëm”. Pavarësisht përkrahjes që ka gjetur gaming përgjatë viteve të fundit, ky medium ende nuk ka dikë që mund të konsiderohet si “më i miri”.

Me 14 milionë ndjekës, Ninja konsiderohet lehtësisht si streamer-i më i njohur, por kjo nuk nënkupton që një person normal do ta njohë se kush është. Lady Gaga është rasti më i freskët për këtë. Gjithsesi, mund të themi me bindje se në 10 vite streaming, ai ka bërë një brand dhe një emër për veten e tij.

“Kuptova që doja të isha më shumë si një cartoon, më shumë si një lloj personazhi dhe jemi duke bërë shumë që ta arrijmë këtë qëllim. Kjo është ideja, të bëhesh një simbol dhe një ikonë.”

Me industrinë e gaming në një rritje të pakrahasueshme, do të jetë interesante të shohim nëse do të ketë një figurë që do të dali sipër të tjerëve dhe të bëhet një simbol për ta.