Netflix e ka rinovuar The Witcher që tani për sezonin e 2

Të mendosh që Season 1 akoma nuk është transmetuar.

Netflix ka rinovuar The Witcher për një sezon të dytë, ndërkohë që Sezoni i parë i serialit me Henry Cavill si Geralt of Rivia akoma nuk është transmetuar.

I njoftuar në 2017, seriali i The Witcher është i bazuar në novelat origjinale nga Andrzej Sapkowski dhe do të ketë ndërlidhjen e tij edhe me videolojërat shumë të njohura nga CD Projekt Red. Kasti i tij përfshin emra si  Freya Allan (The War of the Worlds, Bluebird) si Ciri dhe Anya Chalotra (Wanderlust, The ABC Murders) si Yennefer.

Promovimi i serialit ka hasur vështirësitë e tij. Më herët, fansat e videolojërave në veçanti nuk ishin të kënaqur me përzgjedhjen e Cavill, i njohur më së shumti për rolin e tij si Superman. Traileri i fundit gjithsesi, i ka qetësuar pak gjakrat, pasi Geralt duket më në formë se kurrë.

Në një intervistë, ideatorja e serialit ka thënë se e ka menduar The Witcher paraprakisht për shtatë sezone:

“Unë i kam parashtruar historitë për shtatë vite,” ka konfirmuar Hissrich. “Tani e gjithë ideja është se si do i sajojmë këto histori që të mbërthejnë publikun vit pas viti.”

“Gjëja më e keqe që mund të bëjmë është që ti vendosim të gjitha energjitë tona në Sezonin e 1 dhe të mos mendojmë se ku do i çojë rruga këta personazhe.” Hissrich sugjeroi se jo të gjithë personazhet do të dilnin të paprekur nga Sezoni 1: “Nuk ju premtoj dot se do të jenë të gjithë të gjallë.”

Është gjë e mirë pra që Netflix e rinovoi serialin për një sezon tjetër. Tashmë planet e Hissrich nuk kanë pse të shkojnë dëm. The Witcher e ka premierën në 18 dhjetor.