Ka nisur lufta për kohën tuaj të lirë!
Ka nisur lufta për kohën tuaj të lirë!
Shumë prej nesh do të mendonin se kundërshtarët më të mëdhenj të Netflix do të ishin kompanitë e tjera transmetuese – midis tyre HBO dhe Amazon Video – por në mënyrë surprizuese duket se Fortnite është shqetësimi i vërtetë i drejtorëve të Netflix.
Lajmi vjen nga një letër e cila jepte rezultatet e fundvitit për Netflix. Në këtë letër duket se për kohën e shpenzuar përpara ekranit, ata nuk konkurrojnë vetëm gjigandët e tjerë të transmetimit. Viti i kaluar ishte tepër i suksesshëm për Fortnite dhe Epic Games, të cilët fituan plot 2.4 miliardë dollarë, duke thyer gjithashtu edhe rekordin e fitimeve vjetore për një videolojë, duke qenë gjithashtu tepër popullore me lojtarët rastësorë. Ky sukses mesa duket ka mundur të ndikojë dhe tek shërbimi i ofrurar nga Netflix.
Netflix thotë: “Ne konkurrojmë (dhe humbasim) me Fortnite më shpesh sesa me HBO. Ka me mijëra konkurrentë të tjerë në këtë treg të cilet kërkojnë të argëtojnë konsumatorët… Rritja jonë bazohet në kualitetin e eksperiencës tonë, në krahasim me eksperiencën para ekranit që zgjedhin konsumatorët.”
Ndërkohë që lojra të suksesshme arrijnë të marrin shikues nga Netflix, gjithashtu mund të thuhet dhe e kundërta, edhe pse në një shkallë më të vogël. Disa zhvillues nuk dëshirojnë të nxjerrin lojëra në të njëjtën ditë që një serial i ri lançohet në Netflix. Në qoftë se një numër shumë i madh lojtarësh do të zgjidhte Netflix në vend të një loje të sapo-lançuar, atëherë mundësitë janë shumë të mëdha që kjo do të kishte një ndikim sado të vogël në shitjet e lojës.