Narrativa dhe Cross-Play i Borderlands 3 do ju çudisin

Seritë e Borderlands mund të mbahen mend për tre gjëra. Stili i arrirë artistik, armët dhe narrativa plot humor. Në shumë raste lojtarët shprehen se në lojërat e mëparëshme të Borderlands ka qenë pikërisht historia dhe dialogu ajo që ka kompensuar shumë elementë të tjerë. Mesa duket në Borderlands 3 do të kemi një fokus të lartë në narrativën e lojës, pasi ajo pritet të jetë gjëja më surprizuese rreth saj.

Ky lajm erdhi nga një intervistë që u kryer me drejtorin artisitk të lojës, Scott Kester. Tekstualisht kjo ishte ajo çfarë tha mbi narrativën e Borderlands 3: “Mendoj se njerëzit do të habiten me narrativën brenda kësaj loje dhe të gjithë përpjekien që është vendosur për prezantimin e saj.” Ishte pikërisht kjo fjali nga e gjithë intervista e tij që dalloi më shumë, sepse erdhi si përgjigje e pyetjes: “Cila është gjëja që do i lërë lojtarët me gojë hapur?”

Pra nëse mendonim se milionat e armëve do të na habisnin, duket se ylli i vërtetë i shfaqjes për Borderlands 3 do të jetë narrativa. Kjo nuk është diçka fort e habitshme nga ana e Gearbox. Fundja, Borderlands na ka dhënë një nga antagonistët më të paharrueshëm. Jack është ende një nga të këqinjtë më të mirë që mund të kemi parë ndonjëherë nëpër videolojëra.

Mënyra se si narrativa e një loje zhvillohet ka peshë shumë të madhe në opinionin e përgjithshëm që një lojtar mund të krijojë për të. Rasti kur Wilhelm del nga karroca e shkatërruar e trenit përshembull ose kur Angel zbulon se është një Siren që ka punuar gjatë gjithë kohës për Jack, janë pikërisht disa nga elementet që e bëjnë lojën interesante. Pikërisht kjo narrative që arrin të shokojë lojtarin, rikuperon disa nga aspektet e lojës që mund të mos jenë edhe aq të mira.

Në këtë sens Borderlands 3 ka shumë vend për të zhvilluar një narrativë të mirë. Për të filluar, historia nuk është më e kufizuar brenda Pandora. Planete dhe sisteme diellore të reja mund të eksplorohen. Loja gjithashtu ka dy antagonistë të rinj në vend të një. Gjithashtu të kaluarit e Siren nga ana e keqe ishte një lëvizje shumë e zgjuar.

Pyetja që lind në këtë situatë është nëse kjo narrative kaq fantastike sa ç’premtohet, do të mund të justifikojë të gjitha mangësitë e lojës? Cross-play është një gjë që krahas faktit që të gjithë lojtarët e duan, është realisht e nevojshme në multiplayers. Përsa i përket Borderlands 3 nuk ka patur kurrë një përgjigje konkrete nëse loja do të kishte implementimin e cross-play, por duket se edhe në këtë aspekt fansat nuk do të jenë të zhgënjyer.

Shefi i Gearbox, Randy Pitchford, është shprehur se planet për të sjellë cross-play në Borderlands 3 janë aktive që tani. Thjesht nuk duhet të presim që ky tipar të jetë aty që në lançimin e lojës. Duke qenë se sot do të mbahej një stream e Borderlands nën titullin e “Celebration of Togetherness”, fansat filluan të mendonin se do të ishte për shpalljen e Cross-Playy. Ishte Pitchford ai që tha se eventi nuk kishte lidhje fare me këtë tipar, duke dhënë pastaj shpresa te fansat, me deklaratën që përmendëm në fillim.

“Ky tipar do të vonohet dhe nuk do të vijë në çast, pasi Gearbox do të punojë shumë me partnerët tanë për të krijuar një eksperiencë sa më pozitive të cross-play, në sa më shumë platforma të jetë e mundur.”

Borderlands 3 do të vijë fillimisht si një lojë ekskluzive e Epic Games në aspektin e PC. Gjithsesi ky fakt, që në fillimet e njoftimit të lojës shkaktoi aq shumë polemika, nuk duhet të ndikojë fare në planet e cross-play që zhvilluesit kanë për lojën. Ishte Fortnite një nga lojërat që hapi dyert për të luajturit në platforma të ndryshme dhe do të donim ta shihnim të njejtën fryme bashkëpunimi edhe në lojëra të tjera.

Përsa i përket platformave ekzakte që do të përfshihen në këtë cross-play të planifikuar të Borderlands, misteri vazhdon. Sado që në shumicën e rasteve ka qenë Sony më i përmbajturi për mbështetjen e cross-play, në rastin e final Fantasy XIV, ishte Microsoft ai që u tërhoq në mënyre enigmatike. Gjithsesi le të shpresojmë që në rastin e Borderlands 3 të mos kemi kufizime nga asnjë prej palëve.

Mund edhe të shpresojmë që një ditë cross-play të mbështetet nga të gjitha lojërat, por të gjithë e dimë që situata është shumë më e ndërlikuar se kaq. Nuk do i futemi kësaj teme, pasi është për një artikull më vete, por tani për tani le të kënaqemi me aq sa kemi.

Përsa i përket Borderlands 3, loja do të lançohet në 13 shtator. Nëse jeni përdorues të PC mund ta merrni vetëm në Epic Store dhe nëse jeni përdorues të konsolave mund ta merrni edhe në Xbox One edhe në PS4.