Regjistrimet për Early Access kanë filluar
Regjistrimet për Early Access kanë filluar
Minecon 2019 tashmë ka filluar dhe zhvilluesi Mojang ka disa lajme fantastike për fansat e Minecraft. Minecraft Earth, loja Alternate Reality për mobile do të lançohet së shpejti në të gjithë botën. Është zbuluar se Minecraft Earth do të vijë në Early Access në tetor dhe ju mund të filloni të regjistroheni për të zbuluar se kur do të vijë në vendin tuaj duke nisur që sot.
Mojang ka lajmëruar se Minecraft Earth do të lançohet fillimisht në vende më të vogla nëpër botë, por sapo ajo të performojë mirë në to, loja do të fillojë të lançohet dhe në vende të tjera gjatë ditëve dhe javëve në vijim. Duket se plani është që loja të jetë lançuar në të gjithë globin përpara fundit të këtij viti.
Duke qënë se loja do të jetë në Early Access, lojtarët nuk do të kenë mundësi të provojnë çdo gjë që do të ofrojë versioni përfundimtar, por loja do të ketë gjithsesi veçoritë bazë të saj që e bëjnë atë argëtuese dhe shumë veçori të tjera do të vijnë më vonë, rreth pranverës së 2020. Ideja e studios është që loja të vijë tani tek lojtarët, që ata të ndihmojnë me rritjen dhe zhvillimin e saj, si dhe padyshim që ata të argëtohen.
Loja u lançua në closed beta fillimisht në Londër dhe Seattle më herët këtë vit, prandaj lajmi se më shumë qytete dhe shtete do të kenë mundësi ta provojnë lojën është mjaft i mirë.
Minecraft Earth merr konceptet bazë të lojës origjinale dhe i sjell ato në jetë nëpërmjet AR. Ju do të ecni në jetën reale për të marrë materiale dhe më pas do të ndërtoni objektet që ju dëshironi, të cilat do të shfaqen në madhësinë e tyre në jetën reale përpara jush, të rikrijuara në AR në botën reale. Gjithashtu loja do të ketë multiplayer dhe Adventures, që janë botë të gjeneruara gradualisht ku duhet të arrish disa objektiva.