Në botën e videolojërave tematika e loot boxes, monetizimeve dhe se çfarë quhet kumar është për momentin shumë e ndjeshme. Nuk është ky një argument që shtrohet me fjalë, por një argument që shpesh herë vjen me pasoja ligjore. Qeveritë janë duke qëndruar gjatë kohës vigjilente për mënyrën se si këto probleme agravojnë dhe për ripërkufizimin e vazhdueshëm të tyre.
Është pikërisht Rockstar me update-in e fundit të GTA Online studioja e fundit që ka rinisur luftën nga e para. Diamond Casino & Resort, është DLC më e re e GTA Online, ku të pasurit e Los Santos mund të pijnë, të luajnë lojëra fati dhe të merren me pak krim sigurisht, ka gjithmonë pak krim për tu bërë. Gjithsesi meqë kjo është një kazino, gjithashtu ka edhe pak kumar.
Për shumë qeveri anë e mbanë botës kjo gjë ka tërhequr shumë vëmendjen, deri në pikë ku duhet të merreshin pasoja. Shumë lojtarë janë duke zbuluar që nuk mund të kenë akses në zonat e kumarit në update-in e ri. Është deri tani një listë me 50 vende, që kanë ligje për të ndaluar trajtat e kumarit që shfaqen në GTA Online.
Tregje të mëdha si SHBA, Europa Perëndimore dhe Japonia nuk bëjnë pjesë në këtë listë, ndaj nuk është ndonjë gjendje katastrofike për Rockstar dhe TakeTwo. Gjithsesi nuk është as gjendje e mirë. Njerëzit gjithsesi po ja dalin mbanë me VPN.
Pjesa e lojërave të fatit në GTA Online nuk është e prerë me thikë.Në një mënyrë ti luan me paratë e lojës dhe kjo gjë ka qenë e ligjshme që kur pokeri u animua për herë të parë. Nga ana tjetër pastaj, ato para në lojë i blini me para reale dhe në këtë sens Rockstar ka venë një vlerë specifike të parave të lojës me para reale.
Në këtë sens konceptimi të kumarit, mund të vijnë problematika. Nuk është fort e vështirë të mendosh që mekanika të tilla do ti bëjnë njerëzit të varen dhe të duan të shpenzojnë sa më shumë. Është një problem ky ende i paqartësuar në mënyrën se si qeveritë do ta trajtojnë ekonominë virtuale, që dita ditës vjen duke u përforcuar.