Sony heq Mario nga Dreams pasi Nintendo hap probleme me copyright

Nëse jeni një prej lojtarëve që kanë luajur Dreams, të Media Molecule, keni vënë re një përzgjedhje fantastike të lojërave të krijuara nga vetë përdoruesit. Gjithsesi, duket se Nintendo nuk është shumë i lumtur me një model personazhi të krijuar në të.

Piece of Craft, një përdorues i Dreams që krijoi një model personazhi të Mario, që komuniteti të mund ta përdorë në krijimet e tyre, ka njoftuar se modeli i tij është hequr nga Dreams për arsye copyright-i.

Kjo nuk është shumë e habitshme si situatë në fakt, pasi Nintendo njihet për veprime të tilla që lidhen me copyright në krijimet e tyre. Në një pikë kompania ishte kundër publikimit të xhirimeve të gameplay-it në lojërat e tyre, ndaj do të thonim se është zbutur pak me kalimin e kohës.

Vitin e kaluar u zbulua se Media Molecule ishte duke kërkuar për një liçensë komerçiale që gjërat që përdoruesit bëjnë në Dreams, të përdoren jashtë lojës.

Përsa i përket Marios, Piece of Craft konfirmon se nuk mund ta editojë më modelin dhe se përdorues të tjerë nuk mund ta gjejnë dhe ta përdorin. Ende nuk dihet se si do ndikojë kjo në nivelet ku modeli është vënë në përdorim, pasi ka disa prej tyre që ende mund të luhen.

Sipas Piece of Craft, ai ka një plan që do ta zbulojë më vonë. Ai gjithashtu tha me shaka se mund të krijonte disa modele të Disney, por pastaj konfirmoi se është në bisedime dhe se po pret për marrjen e një përgjigjeje.