Lisa Kudrow, që ka luajtur rolin e Phoebe Buffay përgjatë 236 episodeve të Friends, ka folur për serialin në një intervistë. Sado që qëllimi kryesor i kësaj të fundit ishte promovimi i rolit të saj në Space Force, sitcomi i ardhshëm i Netflix nga Greg Daniels (The Office), Kudrow foli edhe për rolin e saj në Friends.
Teksa ajo ka vetëm fjalë të mira për të thënë për serialin, duke thënë se: “nuk sheh një realitet tjetër ku Friends nuk është serial i mirë”, ajo gjithashtu thotë se një version i Friends i bërë në 2020 do të duhet të kishte disa ndryshime, sidomos kasti plotësisht i bardhë.
“Oh, do të ishte plotësisht ndryshe,” thotë Kudrow, duke reflektuar mbi një version më modern të projektit. Ajo beson se seriali duhet parë si një kapsulë kohore dhe jo për pjesën e gjërave që u bënë gabim. Në të njejtën kohë ajo thotë se seriali ishte shumë progresiv në disa mënyra.
“Kemi një personazh gruaja e të cilit e divorcoi, pasi ishte gay dhe shtatëzanë dhe ata përfunduan duke e rritur djalin së bashku. Për kohën, ka qenë progresive.”
Friends vazhdon të jetë sukses masiv edhe në 2020 dhe Kudrow thotë se bashkimi që do të filmohet për HBO Max nuk do të jetë për ata që luajnë personazhet e tyre, por thjesht për gjashtë njerëz që mblidhen së bashku për herë të parë pas kaq kohësh.
Sitcomi i ardhshëm i Kudrow, Space Force, do të vijë në Netflix në 29 maj.