LeBron James konfirmon se Space Jam 2 do të xhirohet këtë verë

Ylli i NBA konfirmon zërat që qarkullonin prej shumë kohësh

Debati se kush është më i madhi i të gjitha kohërave, LeBron James apo Michael Jordan, është më i nxehtë se kurrë. 34 vjeçari, i cili tani luan me Los Angeles Lakers duket se nuk po tregon asnjë shenjë lodhjeje, duke e ndezur akoma dhe më shumë. Por, tanimë, dy prej lojtarëve më të mëdhenj të të gjitha kohërave duket se do të kenë një tjetër arritje për t’u karahsuar, Space Jam.

Gjatë një interviste në All Star Weekend, James konfirmoi se Space Jam 2, pasardhësi i filmit të shfaqur për herë të parë në 1996 me Michael Jordan, do të nisë xhirimet këtë verë. Duke konfirmuar zërat e mëparshëm, James do të ketë rolin kryesor, duke qenë njëkohësisht edhe producent ekzekutiv.

Filmi origjinal tregon se si Michael Jordan bashkohet me Looney Tunes për t’u përballur me Monstars në një ndeshje basketbolli. Edhe pse filmi nuk u vlerësua me notat më të larta nga kritikët, ai arriti të fitoi zemrat e të gjithë fansave me anë të famës së Jordan dhe argëtimit të pafund të Looney Tunes në ekranin e madh.

Në shtator të 2018, SpringHill Entertainment lajmëroi se filmi pasardhës do të ketë regjizor Ryan Coogler të Black Panther e Terence Nance nga Random Acts of Flyness. Në një intervistë, Nance tha se filmi “do të ndryshojë çdo gjë”.

Së bashku me LeBron James, Eric Bauza do të luajë Bugs Bunny dhe Elmer Fudd në vend të Billy West. Ende ngelet për t’u parë nëse Danny DeVito, Bill Murray apo Michael Jordan do të rikthehen për të luajtur në rolet e tyre të mëparshme.