Leaker-i zbulon se çfarë është Project Bonaire i Rockstar

GTA 6, Bully 2 apo diçka tjetër?

Project Bonaire nga Rockstar padyshim që i la fansat me gojë kur u zbulua në mënyrë misterioze në 21 gusht. Tashmë, një leaker i famshëm i Grand Theft Auto thotë se ka zbuluar se çfarë është ky projekt.

Bonaire u shfaq fillimisht në 21 gusht pasi bordi australian i vlerësimeve IARC refuzoi ta klasifikonte projektin e Rockstar, pasi ai përmbante dhunë dhe përmbajtje seksuale. Kjo padyshim që rriti kuriozitetin e shumë lojtarëve dhe fansat prisnin që diçka mbi GTA 6 ose Bully 2 të zbulohej, por tashmë një leaker pretendon se di se çfarë po vjen.

Ditën e djeshme, leaker-i i famshëm i Rockstar Tez2 postoi një tweet ku thoshte se Project Bonaire është në fakt versioni për PC i Red Dead Redemption 2. Ai gjithashtu shtoi se nuk është i sigurt se pse IARC në Australi refuzoi ta klasifikonte një lojë që e ka klasifikuar më herët, por kjo mund të ketë ndodhur sepse loja mund të ketë përmbajtje të re që nuk gjendet në konsola.

“Titulli misterioz i Rockstar Bonaire është në fakt emri i koduar i RDR2 në PC. Ende nuk dihet shkaku se pse atij iu refuzua klasifikimi, por me shumë mundësi kjo ndodhi sepse versioni i ri i PC ka diçka të re brenda saj, pasi qeveria australiane nuk ka asnjë problem me versionin për konsola të lojës.” – tha ai.

Leaker-i më vonë filloi të jepte disa teori, ku thoshte se refuzimi mund të qe për shkak të programit Rockstar Editor, që erdhi fillimisht në GTA 5 dhe i lejonte lojtarëve të krijonin video të gameplay-t të lojës brenda lojës. Australia në fakt ka pasur probleme më këtë veçori kur ajo erdhi në lojë fillimisht, pra nuk është çudi që kjo shtesë në RDR2 të ketë sjellë të njëjtat probleme me të njëjtin bord.

“Në mënyrë interesante, Bordi Australian i Kualifikimeve në fakt ka pasur probleme me Rockstar Editor në GTA 5 në 2015. Nuk do të ishte surprizuese nëse i njëjti problem të jetë hasur dhe me RDR2 Rockstar Edition që pritet të vijë me versionin në PC,” – tha Tez2.

Më tej, kur u pyet për një datë lançimi për Bonaire, Tez2 dha një periudhë kohore jo dhe aq të sigurt midis fundit të 2019 dhe fillimit të 2020, por edhe ky mund të jetë thjesht një plan që mund të ndryshojë. Megjithatë, ne jemi ende në pritje të zbulimit zyrtar të Project Bonaire.