Kylian Mbappé do të jetë në kopertinën e FIFA 21

Mbappé do të jetë i vetëm në të gjitha kopertinat e FIFA 21

Pas leaks gjatë ditëve të fundit se Kylian Mbappé do të jetë në kopertinën e FIFA 21, EA Sports e konfirmoi këtë gjë duke publikuar kopertinën e lojës, e cila ka në qëndër 21-vjeçarin.

Zhvilluesit postuan gjatë ditës së djeshme kopertinat për versionin për PlayStation 4 të lojës dhe e përshkruan Mbappé si liderin e gjeneratës së ardhshme. Edhe pse francezi është ende i ri, ai ka patur një rol kyç në shumë kampionate futbolli, duke ndihmuar Francën të fitojë Kupën e Botës në 2018, AS Monaco të fitojë Ligue 1 në 2016-17 dhe PSG të fitojë Ligue 1 në 2017-18, 2018-19, dhe 2019-20.

Kjo është hera e dytë që një lojtar i PSG është zgjedhur në kopertinën e FIFA. EA Sports zgjodhi Neymar si një prej lojtarëve në kopertinën e FIFA 19.

Mbappé gjithashtu do të jetë në kopertinën e lojës në versionet për Xbox One, Nintendo Switch dhe PC kur loja të lançohet më 9 tetor. EA do të zbulojë datën e lançimit të FIFA 21 në konsolat e gjeneratës së ardhshme më vonë gjatë këtij viti, me shumë mundësi për shkak se nuk ka një datë zyrtare lançimi për PlayStation 5 dhe Xbox Series X.

EA do të japë një kopje falas të FIFA 21 për PS5 dhe Xbox Series X për këdo që do ta blejë lojën në Xbox One dhe PS4. Lojtarët do të mund të kalojnë progresin e Ultimate Team ndërmjet konsolave nëpërmjet sistemit Dual Entitlement të EA.