Kërkuesit e AdaptiveMobile Security deklarojnë të kenë zbuluar një problem me kartat SIM përmmes të cilit mund të monitorohen paisjet dhe vendndodhjet e disa njerëzve. Kjo u quajt Simjacker dhe praktikisht ideja është që përmes një mesazhi SMS merr informacion rreth paisjes, si vendndodhja e përdoruesit, numri IMEI në paisje dhe më pas i dërgon këto të dhëna në një paisje tjetër prapë përmes një SMS.
Sigurisht që gjatë këtij sulmi përdoruesi në fjalë nuk kupton asgjë. Kjo sepse SMS që dërgohet nuk aktivizon njoftimin e mesazheve dhe nuk as nuk shfaqet si mesazh. Simjacker mund të përdoret në çdo smartphone, pra edhe iPhone dhe Android janë të rrezikuar.
Sipas raportimit kompania që e ka përdorur këtë ka ndjekur shënjestra në mbi 30 vende të botës për dy vite, kryesisht duke u përqëndruar në Lindjen e Mesme, Afrikën e Veriut dhe Europën Lindore. Në disa raste ata kanë dërguar rreth 250 SMS për javë. Nëse shënjestrat e tyre janë kriminelë dhe terroristë ose thjesht aktivistë dhe kundërshtarë politikë, kjo mbetet e paqartë.
“Kjo metodë po përdoret momentalisht nga një kompani private specifike e punësuar nga qeveria për të ndjekur individë të caktuar. Simjacker dhe ide të tjera të ngjashme me të janë një hap i madh para në kompleksitetin dhe sofistikimin e sulmeve që kemi parë kohët e fundit të bëra në rrjetet mobile.”
Ne nuk e dimë se çfarë ka ndodhur me sensin e privatësisë kohët e fundit, por Simjacker është padyshim një tjetër nivel i gjërave. Çdo telefon, pa patur shumë rëndësi modeli i tij mund të ndikohet dhe kush e di se sa shumë njerëz janë prekur tashmë nga ky fenomen. Sipas AdaptiveMobile Security mbi një miliard përdorues global hamendësohen të jenë të ekspozuar ndaj Simjacker.
Lajmi i mirë në këtë mes është që nëse nuk jeni ndonjë figurë e lartë shtetërore ose nuk jeni thellë në telashe për ativitete kriminale, askush nuk do të ketë interes t’ju bëjë hack telefonit. Mund ta bëni gjumin rehat.