Fansat e Apex Legends më në fund do të kenë mundësi ta luajnë lojën në Steam, tani që EA Games dhe Valve do të bashkëpunojnë së bashku.
Ky bashkëpunim do të sjellë disa nga lojërat e EA në platformën e Valve. E para me një datë fikse lançimi do të jetë Star Wars Jedi: Fallen Order, në 15 nëntor dhe tashmë është e disponueshme për pre-order. Lojëra të tjera si The Sims 4 dhe Unravel Two do të vijnë “në muajt e ardhshëm”, sipas website-it të EA.
Kompania ende nuk ka dhënë një datë për debutimin e Apex Legends në Steam, por ka deklaruar se battle royale-i i saj dhe lojëra të tjera multiplayer si FIFA 20 dhe Battlefield V do të jenë të disponueshme në Steam “vitin e ardhshëm”.
Sado që fraza “viti i ardhshëm” është pak e paqartë, qëndron teoria se Apex Legends mund të vijë në Steam në shkurt, si pjesë e një vjetorit të saj. Gjithsesi, deri në këtë pikë ky është i gjithi një spekulim. E vetmja gjë e qartë në deklaratën e EA është që loja do të vijë në një pikë të 2020.
Lajmi i mirë është se kur Apex Legends të vijë në Steam, lojtarët nga të dyja platformat do të mund të luajnë së bashku. Nuk do të ishte kjo hera e parë që Steam ka integruar një launcher të jashtëm në aplikacionin e tij. Lojëra të famshme të Ubisoft si Far Cry, Rainbow Six dhe Assassin’s Creed janë në Steam dhe Uplay.
Një lëvizje e tillë mund t’i bëjë mirë Apex Legends. Në lançimin e saj ajo kishte një rritje spektakolare, me mbi 50 milionë shkarkime në muajin e parë por me kalimin e kohës hype-i i lojës ra dhe të njejtën gjë bëri dhe popullariteti i saj. Le të shpresojmë që me kalimin në Steam, loja do të mund të arrijë stadin e saj të dikurshëm.