Konami ka thënë se vendimi për të hequr Pro Evolution Soccer 2019 nga lojërat e korrikut për PS Plus ishte plotësisht i Sony. PES 2019 u prezantua fillimisht si një nga dy lojërat falas, por papritur Detroit: Become Human i zuri vendin.
Jo më larg se këtë javë, Sony zbuloi dy lojërat që do të jenë falas për të gjithë subscriber-at e PlayStation Plus. Për këtë muaj kompania kishte vendosur Pro Evolution Soccer 2019 të Konami dhe Horizon Turbo Chase.
Gjithsesi pak pas zbulimit të lojërave të reja, Sony konfirmoi se do të hiqnin PES 2019 nga lista, pa dhënë as edhe një shpjegim përse. Kompania thjesht njoftoi se loja do të zëvendësohej me Detroit: Become Human në versionin e tij Digital Deluxe.
“Do të bëjmë një ndërrim të lojërave të korrikut për PS Plus. Këtë muaj do të shtojmë Detroit: Become Human Digital Deluxe Edition në vend të Pro Evolution Soccer 2019. Kërkojmë ndjesë për ndonjë disfavor.” Shkroi Sony në deklaratën e tij.
Sot, Konami u fut në lojë për të sqaruar pak gjërat, duke thënë se vendimi për ta bërë këtë zhvendosje ishte plotësisht i Sony dhe se Konami nuk kishte fare të bëjë me këtë.
Menaxheri i brandit të PES në Europë tha se as nuk ja kishte idenë se çfarë ndodhi. “Nuk mund t’ju them se çfarë ka ndodhur, pasi sot në mëngjes kur u zgjova dhe hapa laptopin e mora vesh dhe vetë. Vërtet që nuk mund ta shpjegoj.” Është shprehur ai.
Duket se kurrë nuk do e dimë arsyen e vërtetë pas kësaj rrëmuje, por nëse do të bënim një hamendësim, do të thoshim që fajin e ka kontrata e re e marketingut që Sony ka lidhur me EA Sports për FIFA.