Mesa duket TikTok është një rrezik kibernetik për ushtrinë amerikane
Mesa duket TikTok është një rrezik kibernetik për ushtrinë amerikane
Joe Rogan Experience është një podcast i cili sjell së bashku ekspertë nga fusha të ndryshme dhe në episodin 1414, komentatori i MMA ftoi Mike Baker, një ish-agjent të CIA, me të cilin diskutuan për botën e sigurisë dhe operacioneve për më shumë se 2 orë.
Gjatë intervistës së tyre, diskutimet kaluan nga Kina dhe lajmi se Shtetet e Bashkuara kanë ndaluar smartphone-t Huawei, pasi akuzuan qeverinë se këto pajisje përdoreshin për spiunazh. Më pas, diskutimi kaloi tek TikTok, i cili është bazuar në Kinë. Për këtë, Baker thotë se ky aplikacion është i ndaluar të përdoret nga ushtria pasi ka lidhje direkte me shtetin aziatik.
“Ata janë munduar të limitojnë mundësitë e TikTok për të bërë biznes në SHBA,” – tha Baker. “Ushtria amerikane i ka kërkuar të gjithë personelit të qëndrojë larg TikTok për të njëjtën arsye. Këto kompani mund të thonë gjatë gjithë kohës se janë të pavarura, por në fund të ditës nëse qeveria kineze troket në derë dhe thotë që duan të futen në databazë për të marrë informacion për çdo anëtar të qeverisë, ata do ta japin. Është një rrezik kibernetik dhe nuk lejohet në telefonat e qeverisë.”
Rogan më pas foli se si vajza e tij 11-vjeçare është e fiksuar pas TikTok dhe i kërkon atij shpesh të bëjnë kërcime së bashku, ndërkohë që Baker thotë se kur e çon djalin e tij të luajë bejsboll, ai shikon shumë fëmijë duke e përdorur aplikacionin.
Nuk dihet nëse qeveria e SHBA do të ndalojë TikTok siç ka bërë me Huwaei, por Rogan zbuloi se zhvilluesit janë munduar që të sjellin një prej drejtorëve të tyre në Joe Rogan Expereince, gjë për të cilën ai nuk është i interesuar.
“Interesante,” – tha Baker kur e dëgjoi këtë. “Jo në fakt, jo për mua. Nuk do të ndodhë,” – tha Rogan.