Ja sa kohë ju duhet për të blerë çdo kampion në League of Legends

Një lojtar ka llogaritur se sa kohë duhet që të blesh çdo kampion në lojë

League of Legends është një lojë free-to-play, e cila nuk kërkon asnjë pagesë fillestare për të luajtur lojën. Teknikisht, çdo aspekt i gameplay në League of Legends mund të merret pa shpenzuar asgjë.

Megjithatë, kampionët nuk janë të gjithë të hapur për lojtarët. Çdo javë ka një rotacion me 15 kampionë falas që çdo lojtar mund t’i luajë, por për t’i hapur përfundimisht ju duhet të shpenzoni Blue Essence ose RP.

RP janë monedha që mund të blihen me para reale në League of Legends, ndërkohë që Blue Essence fitohen gradualisht duke luajtur lojën. Në teori, një lojtar mund të hapë të gjithë 146 kampionët e lojës pa shpenzuar asgjë në lojë.

Megjithatë, sa kohë duhet për ta arritur këtë gjë? Një përdorues në Reddit ka marrë përsipër të llogarisë kohëzgjatjen, duke marrë parasysh koston e tanishme të kampionëve dhe mënyra të ndryshme për fitimin e Blue Essence.

Kjo është më e komplikuar seç duket. Në 30 nivelet e para, lojtarët marrin më shumë shpërblime dhe kjo pjesë llogaritet shumë lehtë. Më vonë, duhet të merren parasysh dhe aspekte të tjera si vlera mesatare si dhe mënyra të tjera për të fituar Blue Essence, siç janë bonuset e fitore dhe evente dhe misione që Riot sjell gjatë vitit.

Padyshim që numri i lojërave që luan në ditë ka rëndësi. Me një lojë në ditë, llogaritet që duhen 3424 ditë, thuajse 9 vite e gjysmë.

Nëse e rrisni këtë mesatare, si dhe llogarisni bonuse si chests kur merr notën S, koha më e shkurtër për të marrë çdo kampion në lojë është pak më shumë se 1 vit. Kjo është e vërtet kur merret parasysh fakti që ju luani mesatarisht 10 lojëra në ditë.

Edhe pse në të vërtetë asnjë lojtari nuk i duhen të gjithë kampionët e lojës, kjo është një përllogaritje shumë e mirë për lojtarët që nuk duan të shpenzojnë asgjë në lojë dhe të shohin se sa kohë duhet për të marrë çdo kampion.