Heroi më i ri që do të vijë në Overwatch quhet Baptiste

Heroi i ri është një shërues me një histori tragjike.

Blizzard Entertainment ka zbuluar heroin më të ri të Overwatch: Jean-Baptiste Augustin, ose shkurt Baptiste. Një hero i ri ishte paralajmëruar kohët e fundit në formën e një letre të koduar ku Baptiste ishte shënjestra e një sulmi të Talon. Baptiste përshkruhet si një “shërues luftëtar“, që domethënë se ai është një tjetër personazh ndihmës.

Llogaria zyrtare e Overwatch në Twitter postoi historinë e origjinës së Baptiste. Ai ngeli jetim gjatë luftës Omnike, një betejë mbarëbotërore midis njerëzve dhe robotëve. Si përfundim, ai zgjodhi jetën e krimit me Talon, një organizatë misterioze, pjesë e së cilës janë gjithashtu Sombra dhe Widowmaker.

Letra e mëparshme tregonte se Baptiste ishte një i larguar nga rradhët e Talon dhe autori i letrës po e kërkonte atë që t’a sillte. Në video, Baptiste tregon se ai kishte patur disa zgjedhje në jetën e tij, por gjithmonë bënte të gabuarat. Historia e origjinës mbyllet me një paralajmërim, që me shumë mundësi përshkruan se si do të jetë stili i tij i lojës. “Unë do të luftoj për një botë më të mirë” thotë Baptiste. “Për disa, kjo do të thotë një fasho. Për disa të tjerë, një plumb. Sot, t’a jap ty zgjedhjen.”

Data e lançimit të Baptiste nuk është konfirmuar akoma. Megjithatë, duket se ai do të jetë një personazh mbështetës me fuqi shëruese, por edhe mundësi për DPS. Ai përshkruhet si një shërues luftarak. Në letër, autori thotë se “kurrë nuk ka njohur një shërues kaq të aftë me armët” sa Baptiste. Gjithashtu, nuk janë zbuluar ende aftësitë e tij.