Harry Potter: Wizards Unite është i disponueshëm për tu shkarkuar

Për ne këtu në Shqipëri do të jetë pak e vështirë gjithsesi.

Harry Potter: Wizards Unite është loja e re AR nga zhvilluesit e Pokemon Go. Loja tani është publikuar për Amerikën e Veriut dhe për të gjithë ju që doni ta luani thjesht futini një VPN, pasi loja u lançua një ditë më herët nga çfarë parashikohej. Loja është falas dhe shumë njerëz janë duke e luajtur momentalisht.

Për ju që nuk e dini se për çfarë po flasim: Harry Potter: Wizards Unite është praktikisht Pokemon Go, por me Harry Potter. Sigurisht që kjo është ta thuash me terma shumë të lehta, por që ideja prapë qëndron njëlloj. Krahas përmbajties dhe personazheve nga Harry Potter, gjithashtu janë të implementuara dhe personazhe nga filmat e Fantastic Beasts.

“Një katastrofë ka ndodhur në botën e magjisë, duke shkaktuar artifakte, krijesa, njerëz dhe kujtime të shfaqen në botën e Muggles-ave.” Lexon përshkrimi zyrtar i lojës. “Shtrigat dhe magjistarët përqark globit duhet të bashkohen për të zgjidhur misteret dhe për ti kthyer këto gjëra në vendin e tyre përkatës, duke i mbajtur të sigurtë nga sytë e Muggles-ave.”

Në fillim të lojës ju viheni në rolin e një rekruti të ri në State of Secrecy Task Force që është ngritur nga Ministri i Magjisë për të hetuar The Calamity.

Tani problemi i vetëm është që loja është lançuar zyrtarisht vetëm në rajonin e UK dhe US. Më vonë Niantic do ta kalojë në rajone të tjera, pak a shumë njëlloj si me Pokemon Go. Nëse jeni përdorues të Android mund ta gjeni si APK online dhe nëse jeni përdorues të iOS mund ta merrni me një adresë brenda këtyre rajoneve ose të ndërroni rajonin e adresës suaj. Gjithsesi është raportuar se në rajonet ku loja nuk është lançuar zyrtarisht, harta e saj paraqitet bosh, pasi serverat nuk janë të instaluar. Le të shpresojmë që kjo gjë do të ndryshojë me kalimin e kohës.