GTA 6 mund të vijë si një projekt i vogël fillimisht duke u zgjeruar më tej me DLC

Viti 2018 ishte pak i përzier për Rockstar nga perspektiva e PR. Nga njëra anë Red Dead Redemption 2 më në fund u lançua, duke marrë vlerësime të shkëlqyera nga kritika dhe nga ana tjetër lindën akuza se punonjësit e Rockstar punonin orë të zgjatura për t’i sjellë produktet në kohë. Fatmirësisht duket se gjërat kanë ndryshuar që nga ajo pikë.

Sipas një raportimi të ri nga Jason Schreier i Kotaku, Rockstar ka bërë disa ndryshime për të përmirësuar kushtet e punës në studiot e tyre. Një numri të madh punonjësish po i ofrohet fleksibilitet në oraret e punës, duke i lejuar të punojnë në ritmin që dëshirojnë ata mbi punën e tyre.

Përtej kësaj disa menaxherë që konsideroheshin si “toksikë” janë pushuar dhe gjithashtu liderët e zyrave të tyre në San Diego, Kaliforni dhe Lincols, UK janë zëvendësuar. Disa prej tyre janë edhe optimistë se largimi i fundëm i Dan Houser mund të sjellë më shumë lirshmëri te stafi.

Sado që Houser ishte një medje briliante përsa i përket kreativitetit, por ai shpesh bënte ndryshime në minutën e fundit, që krijonin shumë punë shtesë për punëtorët. Mund të themi me bindje që punonjësit janë të kënaqur.

Pyetja që lind është se si kjo kulturë e re pune ka për të ndikuar lojërat e ardhshme? Sipas Schreier projekti i ardhshëm i Rockstar është Grand Theft Auto 6. Plani është që në fillim të vijë si një lojë me përmasa mesatare dhe më pas të zgjerohet përmes DLC-ve dhe update-ve dhe jo të vijë e gjitha njëheresh si me rastin e Red Dead Redemption 2.

Pergjithësisht duket ide e mirë që përmasa e GTA 6 të jetë më e arsyehme në fillim. E para sepse heq të gjithë presionin nga punonjësit e Rockstar dhe e dyta sepse nënkupton që do të vijë më shpejt. RDR 2 ishte një lojë mbreslënëse, por shumë mund të argumentojnë se ishte pak e madhe dhe donte një kohë të gjatë për tu mbyllur.